მოგზაურობა 300 წლის შემდეგ - ჟურნალისტმა პაატა ნაცვლიშვილმა სულხან საბა ორბელიანის მოგზაურობის გამეორება გადაწყვიტა. ნაცვლიშვილი ზუსტად გაივლის იმ მარშრუტს, რომელიც სულხან-საბა ორბელიანმა გაიარა 300 წლის წინათ, 1714-1715 წლებში.
"სულხან-საბა ორბელიანმა ევროპაში თავისი მოგზაურობით, რომელიც 1713 წელს დაიწყო, გარეშე მტრებისაგან დიდად შეჭირვებული საქართველოსთვის დასავლეთის ქვეყნების პოლიტიკური მხარდაჭრის მოპოვებას ცდილობდა. ამ მიზნით იგი რამდენჯერმე შეხვდა რომის პაპს, კლემენტე XI-ს, საფრანგეთის მეფეს, ლუდოვიკო XIV-ს და იმდროინდელი დასავლეთის სხვა სახელმწიფო თუ სასულიერო მოღვაწეებს.
სულხან-საბას ევროპული მისია საქართველოს დასავლური ორიენტაციის, მისი პრაქტიკული გამოვლინების ყველაზე თვალსაჩინო დემონსტრაცია იყო. სამწუხაროდ, მაშინ თავის პრობლემებში ჩაფლულმა ევროპამ საქართველოსთვის ვერ მოიცალა და სულხან-საბა ორბელიანი ვახტანგ VI-სთან ერთად იძულებული გახდა ქვეყნის გადარჩენის სხვა გზები ეძებნა. თავისი ევროპული მოგზაურობა სულხან-საბა ორბელიანმა დაწვრილებით აღწერა დღიურების სახით, რომელიც ქართული მწერლობის ერთ-ერთ უმნიშვნელოვანეს ძეგლს წარმოადგენს. დღიურების პირველი ნაწილი, სამწუხაროდ, დაკარგულია და ჩვენამდე მოღწეული ტექსტი საფრანგეთიდან იტალიაში გადასვლით იწყება" - აღნიშნავს ნაცვლიშვილი.
პაატა ნაცვლიშვილის მიერ დაგეგმილი მოგზაურობის გამეორება სწორედ სულხან-საბას ტექსტს ეყრდნობა. იგი შეეცდება ზუსტად იმ დღეს აღმოჩნდეს მონაკოსა თუ გენუაში, რომსა თუ ფლორენციაში, სიცილიასა თუ მალტაზე, მიტილენესა თუ კონსტანტინოპოლში, როცა იქ სულხან-საბა ორბელიანი ჩავიდა 300 წლის წინათ. იგი შეეცდება, შეხვდეს იმ მოღვაწეთა პოლიტიკურ მემკვიდრეებს, რომელთაც სულხან-საბა ორბელიანი შეხვდა ევროპაში მოგზაურობისას, მოინახულოს ის ადგილები, რომლებსაც საქართველოს ელჩი ეწვია სამი საუკუნის წინათ.
პაატა ნაცვლიშვილის მოგზაურობა პარიზით დაიწყო. 9 ივნისს იგი საფრანგეთის დედაქალაქში ჩაფრინდა. 10 ივნისს შეხვდა საქართველოს საგანგებო და სრულუფლებიან ელჩს საფრანგეთში ეკატერინე სირაძე-დელონეს, რომელიც წინასწარვე იყო ინფორმირებული პროექტის თაობაზე. ელჩმა ხაზი გაუსვა პროექტის აქტუალობას, განსაკუთრებით ევროკავშირთან ასოცირების ხელშეკრულების მოახლოებული ხელმოწერის კონტექსტში.
შეხვედრის შემდეგ პაატა ნაცვლიშვილი სამხრეთისკენ გაემგზავრა, სულხან-საბას მარშრუტით.
16 ივნისს მას საქართველოს ელჩი შეუერთდა მონაკოში და მონაკოს პრინცის სასახლეში გაიმართა მიღება, რომელსაც ესწრებოდნენ პრინც ალბერის მრჩეველი - ან-მარი ბუაბუვიე და არქივისა და ბიბლიოთეკის დირექტორი - თომას ფუილერონი. თავად პრინცი ალბერ II ამერიკის შეერთებულ შტატებში სახელმწიფო ვიზიტით იმყოფებოდა და ამის გამო ვერ შეძლო მათი მიღება.
იმავე საღამოს ელჩმა პაატა ნაცვლიშვილი საფრანგეთ-იტალიის საზღვრამდე მიაცილა და თავის რომაელ კოლეგას, ბატონ კახა სიხარულიძეს „გადააბარა".
მოგზაურობა გრძელდება.
