პარტია ,,საქართველოს გზის" დამფუძნებელი, სალომე ზურაბიშვილი მიიჩნევს, რომ მისი პრეზიდენტობის კანდიდატად  დარეგისტრირებისთვის სამართლებრივი ბარიერები არ არსებობს. როგორც ზურაბიშვილმა, ტელეკომპანია ,,რუსთავი 2"-თან საუბრისას  აღნიშნა,  კონსტიტუციური  ნორმა, რომ  პრეზიდენტი  არ შეიძლება ორმაგი მოქალაქეობის მქონე პირი იყოს, პრეზიდენტობის კანდიდატს არ ეხება. მისი თქმით, ეს საკითხი უშუალოდ ფიცის დადების მომენტში გადაწყდება. ზურაბიშვილმა,  ბალტიისპირეთის ქვეყნების მაგალითი, მოიყვანა, სადაც მსგავსი პრაქტიკა არსებობს.

,,საქართველოს გზის" ლიდერის განმარტებით, პრობლემას არ ის წარმოადგენს, რომ  რომ ბოლო სამი წელი  საქართველოში არ იმყოფება.  ,,მე ვარ დანიშნული გენერალური მდივნის მიერ გაეროში და არცერთ ქვეყანას არ წარმოვადგენ. ვმუშაობ საერთაშორისო ორგანიზაციაში რაც საერთაშორისო ნორმის მიხედვით, ქვეყნიდან გასვლად არ ითვლება. ღრმად ვარ დარწმუნებული, რომ დადებით პასუხს მივიღებ. მე მგონი, ამ ქვეყანაში დამთავრდა დრო, როცა კანონის ინტერპრეტაციით უშლიდნენ ხელს რომელიმე კანდიდატს"-აღნიშნა ზურაბიშვილმა.