სამოქალაქო აქტივისტმა, ირაკლი ყიფიანმა „რეპორტიორთან" საუბარისას განაცხადა, რომ ხვალ უზენაეს სასამართლოსთან დაგეგმილ აქციას უერთდება. მისი თქმით, კოტე კუბლაშვილის მეთაურობით ქართული სასამართლო პარტიულ კანტორად იყო ქცეული, რამაც მრავალი ადამიანის სიცოცხლე, ფსიქოლოგიური და მატერიალური მდგომარეობა შეიწირა.
„კოტე კუბლაშვილის მეთაურობით ქართული სასამართლო პარტიულ კანტორად იყო ქცეული, რომელიც ასრულებდა პოლიტიკურ დაკვეთებს და სადამსჯელო დაჯგუფებად მოგვავლინა „ნაციონალურმა მოძრაობამ", რომ აღარაფერი ვთქვა დაშინებულ მოსამართლეებზე და ათასობით უკანონოდ გამოტანილ გადაწყვეტილებებზე, რომლებმაც მრავალი ადამიანის სიცოცხლეც, ფსიქოლოგიური და მატერიალური მდგომარეობაც შეიწირა. ამ ყოველივეზე პასუხისმგებელი უკვე ღრმად პატივნაცემი და კოჰაბიტირებული უზენაესი სასამართლოს თავმჯდომარე კოტე კუბლაშვილი გახლდათ.
გამომდინარე აქედან ვფიქრობ, რომ დიდი აქტივობა უნდა იყოს ხვალინდელ აქციაზე და რაღა თქმა უნდა მეც ვუერთდები ჩემს თანამოაზრეებთან ერთად აღნიშნულ მანიფესტაციას.
ვფიქრობ, არა მხოლოდ გადადგომა უნდა იყოს აქციის მთავარი მოთხოვნა, არამედ სისხლის სამართლის დამნაშავის კოჰაბიტირებული კოტე კუბლაშვილის ხელზე ბორკილების ჟღარუნის მოსმენაც. მითქვამს და ვიმეორებ: სანამ არ შეიქმნება საქართველოში პრეცენდენტი იმისა, რომ პასუხი აგოს ნებისმიერმა მაღალი თანამდებობის პირმა ჩადენილ დანაშაულზე, მანამდე ამ ქვეყანაში უკეთესობისკენ ძვრებს არავინ უნდა ველოდოთ. ყველას და ყველაფერს უნდა დაერქვას თავისი სახელი და მხოლოდ შემდგომ შეგვიძლია ვიმედოვნოთ უკეთესი ხვალინდელი დღე, თუნდაც კუბლაშვილის გასამართლების შემთხვევაში - უკეთესი, სამართლიანი სასამართლო, რომელიც პარტიულ დაკვეთებს აღარ შეასრულებს. სასამართლო, რომელიც იდგება სამართლის და არა რომელიმე პოლიტიკური ძალის სამსახურში."- განაცხადა ირაკლი ყიფიანმა.
შეგახსენებთ, ქართველი ხელოვანები და საზოგადო მოღვაწეები ხვალ 15:00 საათზე უზენაესი სასამართლოს წინ, სასამართლოს თავმჯდომარის, კოტე კუბლაშვილის თანამდებობიდან გადაყენების მოთხოვნით მშვიდობიან აქციას გამართავენ.
