ხვალ საქართველოს კულტურისა და ძეგლთა დაცვის მინისტრი გურამ ოდიშარია კულტურის სამინისტროს მხარდაჭერით გამართულ „ბათუმის კლასიკური მუსიკის ფესტივალს" გახსნის.
ფესტივალის სამხატვრო ხელმძღვანელი ცნობილი ქართველი პიანისტი, მრავალი საერთაშორისო კონკურსისა და საქართველოს სახელმწიფო პრემიის ლაურეატი ელისო ბოლქვაძეა.
„ბათუმის კლასიკური მუსიკის ფესტივალის" ფარგლებში დაგეგმილია კონცერტები, სადაც მონაწილეობას მიიღებენ ქართველი და მსოფლიო დონის უცხოელი მუსიკოსები. მათ შორის, ინგოლშტადტის ქართული კამერული ორკესტრი, ბათუმის სიმფონიური ორკესტრი, ელისო ბოლქვაძე, ქეთევან ქემოკლიძე, ფრანჩესკო ნიკოლოზი, ანტუან პეკერი, ბრუნო მონსანჟანი, და სხვ. ბათუმის კლასიკური მუსიკის ფესტივალი მიზნად ისახავს მუსიკოსების აღმოჩენასა და ხელშეწყობას.
ცნობილი მუსიკოსები ცოდნასა და გამოცდილებას ქართველ ახალგაზრდებს გაუზიარებენ.
ფესტივალის ბოლო დღეს, 15 ივლისს, გაიმართება კონცერტი „ნორჩი ტალანტების აღმოჩენა".
