საქართველოს ჟურნალისტური ეთიკის ქარტიის საბჭოს შეფასებით, 9 ივლისს GDS-ის ეთერში გასულ გადაცემა "ბინა 18"-ში გარკვეული მონაკვეთი მაუწყებლის შესახებ კანონის დარღვევა იყო, რომელმაც უკვე გამოიწვია საზოგადოების ნაწილის, არასამთავრობო სექტორისა და სახალხო დამცველის პროტესტი.
„ჟურნალისტური ეთიკის ქარტია ყურადღებით აკვირდებოდა გადაცემის გარშემო მიმდინარე პროცესებს და იმედოვნებდა, რომ ტელეკომპნიის ხელმძღვანელობა და გადაცემის ავტორებიც გააცნობიერებდნენ, პირველ რიგში, მედიის პასუხისმგებლობას და პროგრამის უხამსი და დისკრიმინაციის ნიშნების შემცველი მონაკვეთის გამო ბოდიშს მოიხდიდნენ.
როგორც აღმოჩნდა, გადაცემის შემოქმედებითი ჯგუფისთვის გაუგებარია საზოგადოების იმ ნაწილის არგუმენტები, რომელმაც აღნიშნულ გადაცემაში გენდერული დისკრიმინაციის წახალისება დაინახა და გააპროტესტა.
საქართველოს ჟურნალისტური ეთიკის ქარტიის საბჭო ადასტურებს თავის უარყოფით დამოკიდებულებას გადაცემის კონკრეტული ფრაგმენტისადმი, ეთანხმება უკვე გამოთქმულ პროტესტს და თავის მხრივ მიიჩნევს, რომ ტელეკომპანიამ კონკრეტული გადაცემის ფრაგმენტით დაარღია კანონი მაუწყებლობის შესახებ და მაუწყებელთა ქცევის კოდექსი, რომელიც უხამსობის შემცველი, დისკრიმინაციის წამახალისებელი და მოქალაქის ღირსებისა და ძირითად უფლებათა შემლახავი პროგრამების გადაცემას კრძალავს", - ნათქვამია ჟურნალისტური ეთიკის ქარტიის მიერ გავრცელებულ განცხადებაში.
(მოამზადა ნინი მოდრეკილმა)
