ინტერნეტგამოცემა "luganskie.com"-ის ინფორმაციით, ე.წ. სამხრეთ ოსეთმა ლუგანსკში ჰუმანიტარულ დახმარებასთან ერთად, იარაღის პარტიაც გააგზავნა.
"სამხრეთ ოსეთმა არა მხოლოდ ლუგანსკის სახალხო რესპუბლიკის დამოუკიდებლობა აღიარა, არამედ მას დახმარებასაც უწევს. უახლოეს დღეებში სამხრეთ ოსეთიდან ძვირფას საჩუქარს მივიღებთ", – აღნიშნულია ამავე ინტერნეტგვერდზე განთავსებულ ინფორმაციაში.
საიტის ინფორმაციით, მიმდინარე კვირას ტვირთი რეგიონში ჩავა. "ეს იქნება კონტეინერები იარაღით, მათ შორის სნაიპერების იარაღები, ავტომატები, პისტოლეტები. სწორედ პისტოლეტების ნაკლებობა გვაქვს ლუგანსკის რესპუბლიკაში იმისთვის, რომ პატრული შევაიარაღოთ. იქნება ასევე ხელყუმბარები. არ ვიცი კიდევ რას გამოგვიგზავნიან. სავარაუდოდ, იქნება ჯავშანჟილეტები და ჩაფხუტები", – აცხადებს ინტერნეტსაიტთან ე.წ. ლუგანსკის რესპუბლიკის მთავრობაში ანონიმური წყარო.
კომენტარი გააკეთეს ცხინვალის მარიონეტული რეჟიმის თავდაცვის სამინისტროშიც გაკეთდა. სააგენტო "რესის" ინფორმაციით, ე.წ. სამხრეთ ოსეთს ლუგანსკში არავითარი იარაღი არ გაუგზავნია. მათივე განცხადებით, იარაღის გაგზავნა ტექნიკურადაც კი შეუძლებელია. "ლუგანსკში იარაღის შეტანა შეუძლებელია შესაბამისი შეთანხმების გარეშე - მესამე ქვეყნის ნებართვის გარეშე, კონკრეტულად კი, რუსეთის გავლით. ასეთი შეთანხმება არ არსებობს და მსგავსი საკითხი არც კი დგას", – ნათქვამია განცხადებაში.
