პროკურატურა მალე კიდევ ერთი საქმის გამო წაუყენებს ბრალდებას, იმჟამინდელ თბილისის მერის მოვალეობის შემსრულებელ და ამჟამინდელ საკრებულოს წევრ სევდია უგრეხელიძეს.

როგორც პროკურატურაში განაცხადეს, სევდია უგრეხელიძემ 20 იანვარს თბილისის ტელეანძა შანტაჟის მიზნით გათიშა. თბილისის საკრებულო მერიას ბიუჯეტს არ უმტკიცებდა და ზეწოლის ამ გზას მიმართა. „თბილისის საკრებულოს უმრავლესობამ არ დაამტკიცა თბილისის ბიუჯეტი. ამაში იყო პოლიტიკური ხასიათისა და ყურით მოთრეული მიზეზები. მათ შორის, თბილისის ტელეანძის განათება. ჩვენ გადავწყვიტეთ გამოვრთოთ ტელეანძა სანამ ბიუჯეტი არ დამტკიცდება," - იმუქრებოდა მაშინ დროებითი მერი.

ეს ანძა მნიშვნელოვან ობიექტს წარმოადგენს საორიენტაციოდ, აერონავიგაციის დისპეჩერები ამ ანძის მეშვეობით  მითითებებს აძლევენ თვითმფრინავების ეკიპაჟებს, როცა ისინი თბილისის აეროპორტში დაჯდომა-აფრენას ახორციელებენ.

როგორც ცნობილია, იმ პერიოდში თვითმფრინავები საფრთხის ქვეშ იმყოფებოდნენ და ავარიულ დაჯდომას ახორციელებდნენ.