ოკუპირებული აფხაზეთის ე.წ. ახლად არჩეული პრეზიდენტის რაულ ხაჯიმბას განცხადებით, გალის რაიონის მცხოვრებლები მოქალაქეობასთან დაკავშირებით უნდა ჩამოყალიბდნენ, რათა მათი უფლებები დაცული იყოს.
ხაჯიმბამ კომენტარი "იტარ-ტასთან" ექსკლუზიურ ინტერვიუში გააკეთა.
" ჩვენ გავცემთ აფხაზურ პასპორტებს მათზე, ვინც კანონის დაცვით მოგვმართავს მოქალაქეობის მინიჭებაზე, როგორც ეს გათვალისწინებულია ჩვენი კანონმდებლობით. ვინც თავს საქართველოს მოქალაქეებად მიიჩნევენ, ქართული კანონმდებლობის მიხედვით არ აქვთ უფლება, სხვა სახელმწიფოს მოქალაქეებიც იყვნენ. ჩვენ ამას ხელს არ ვუშლით, პირიქით, დაე, იცხოვრონ თავიანთი მოქალაქეობით, მაგრამ ჩვენ უნდა ვიცოდეთ, საქართველოს რამდენი მოქალაქე ცხოვრობს ჩვენს ტერიტორიაზე", - განაცხადა რაულ ხაჯიმბამ.
მისივე თქმით, ყოველივე ზემოაღნიშნული დაკავშირებულია როგორც უსაფრთხოების, ისე ეკონომიკურ და სოციალურ საკითხებთან.
"ჩვენ გვინდა რეგიონში წესრიგი დავამყაროთ და ადგილობრივი მოსახლეობის უფლებების რეალიზაციისთვის სამართლებრივი პირობები შევქმნათ, ამისთვის უნდა ვიცოდეთ, რა სტატუსით ცხოვრობს ხალხი აფხაზეთის ტერიტორიაზე", - დასძინა რაულ ხაჯიმბამ.
