რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძემ საქართველოს მუსლიმებს ყურბან-ბაირამის დღესასწაული მიულოცა. როგორც ვაშაყმაძის მიმართვაშია აღნიშნული, საქართველო მრავალრელიგიური და მრავალეთნიკურია, ტოლერანტობა კი ჩვენი ქვეყნის ძირძველი ტრადიციაა.
"გილოცავთ ყურბან-ბაირამის ბრწყინვალე დღესასწაულს. წარმატებას, მშვიდობასა და გაძლიერებას გისურვებთ ჩვენი საერთო სამშობლოს - საქართველოს საკეთილდღეოდ. მუსლიმებისთვის ეს დღე ცოდვების მიტევების, მორჩილების, თმენის, კაცთმოყვარეობისა და სიკეთის აღმნიშვნელია. გულითადად ვუერთდები თქვენს დღესასწაულს და გისურვებთ ამ გზაზე კვლავაც რწმენითა და დიდი სიყვარულით გევლოთ. ეს ძალა აერთიანებს სხვადასხვა აღმსარებლობის ადამიანებს, ერებსა და ქვეყნებს. ჩვენი ქვეყანა მრავალრელიგიური და მრავალეთნიკურია, ტოლერანტობა ჩვენი ქვეყნის ძირძველი ტრადიციაა, ამიტომაცაა ჩვენი ურთიერთობა ასეთი მეგობრული და ჩვენი თანამშრომლობა ასეთი მჭიდრო. ვიმედოვნებ, რომ ერთობლივი ძალისხმევით კვლავაც შევძლებთ ერთიანი და ძლიერი საქართველოს შენებას", - მიმართა საქართველოში მცხოვრებ მუსლიმებს ზაზა ვაშაყმაძე.
(მოამზადა ნინი მოდრეკილმა)
