11 ოქტომბერს თბილისში  ქართული საბრძოლო ხელოვნებისა და სამოსის ფესტივალი გაიმართება. რუსთაველის გამზირზე მსვლელობაში მონაწილეობას მიიღებენ „შავფაროსნები", თავდაცვის სამინისტროს ჩოხოსანთა ასეული, ფოლკლორული ანსამბლები, ცხენოსნები და ეროვნული ტანსაცმლით შემოსილი ადამიანები.

 ევროპის მოედანზე 16:00 საათიდან ფესტივალის მეორე ნაწილი დაიწყება, რომლის ფარგლებში ქართული საბრძოლო ხელოვნების საჩვენებელი წარმოდგენები, ბაზიერების შოუ, შეჯიბრი მშვილდოსნობაში, ქალაქური კრივი, ქართული ტრადიციული თამაშობები და შეჯიბრებები გაიმართება.

ფესტივალის ფარგლებში რიყეზე მოეწყობა გამოფენები: „ქართველ მეფეთა ხელნაწერები", ბუბა კუდავას ფოტოგამოფენა, „ტაო-კლარჯეთის ციხე-სიმაგრეები".

ქართველი მჭედლები  ევროპის მოედანზე პირდაპირ მაყურებლის წინაშე გრდემლზე რკინას გამოჭედენ და მათ მიერ დამზადებულ იარაღსაც გამოფენენ.

ფესტივალის დასასრულს გაიმართება დასკვნითი კონცერტი, რომელშიც  მონაწილეობას მიიღებენ ფოლკლორული ანსამბლები - „შავფაროსნები", „ჩვენებურები". კონცერტს მოძრაობის თეატრის  „ცეცხლოვანი შოუ" დახურავს.

 „შავფაროსნების" განცხადებით, სასურველია, ფესტივალზე მოქალაქეები ეროვნული სამოსით მივიდნენ.

ფესტივალის მხარდამჭერია ბავშვთა და ახალგაზრდობის განვითარების ფონდი. ღონისძიების გენერალური სპონსორია ლუდი მთიელი. 

(მოამზადა ქეთი ებიტაშვილმა)