სოფელ ძველ ქანდაში 13 წმინდა ასურელი მამის სახელობის ტაძარის მშენებლობა დასრულებულია. როგორც „რეპორტიორს" ტაძრის წინამძღვარმა მამა სერაფიმე ბითხარიბმა განუცხადა, ამჟამად ტაძრის კედლების მოხატვა მიმდინარეობს.
„ტაძარი შევამკეთ ძველი აგურითა და ნიჩბისის ქვით. მოხატვაც დავიწყეთ. იხატება ორ ენაზე: ქართულზე და არამეულზე, წარწერები ამ ორ ენაზე იქნება. ღვთის მადლითა და უწმინდესის ლოცვა-კურთხევით, ეს ტაძარი მოსახლეობის აშენებულია. არ გამოგვიყენებია არანაირი ტექნიკა. საძირკველიც ხელით ავაშენეთ. ხელითა და ლოცვითაა ეს ტაძარი აშენებული", - განაცხადა მამა სერაფიმემ.
13 წმინდა ასურელი მამის სახელობის ტაძრის მშენებლობა 2013 წლის იანვარში დაიწყო და 6 თვეში დასრულდა. სულ მალე სოფელ ძველ ქანდაში მცხოვრებ 2000-ზე მეტ მართლმადიდებელ ასირიელს შესაძლებლობა ექნება, ამ ტაძარში ილოცოს. ახალაშენებული ტაძრის ეზოში ღვთისმშობლის სახელობის ტაძარია, თუმცა, მორწმუნეთა სიმრავლის გამო, ეს ტაძარი მრევლს ვერ იტევს.
