გიორგი ცაბაძისა და გია ყანჩელის მუსიკა ამერიკელი მესაყვირის შესრულებით - დიდ საკონცერტო დარბაზში გრემის მფლობელის კრის ბოტის კონცერტმა სრული ანშლაგით ჩაიარა. ღონისძიებას საქართველოს პრემიერ-მინისტრი ირაკლი ღარიბაშვილი მეუღლესთან ერთად დაესწრო.
კრის ბოტმა სცენაზე ნიკოლოზ რაჭველის დირიჟორობით საკუთარ ბენდთან და სახელმწიფო სიმფონიურ ორკესტრთან ერთად დაუკრა. საღამოზე ცნობილ კომპოზიციებთან ერთად, ქართველი კომპოზიტორების სიმღერები კრის ბოტმა ნანი ბრეგვაძესთან და პაატა ბურჭულაძესთან ერთად შეასრულა.
საქველმოქმედო კონცერტი ფონდ „იავნანას" მხარდასაჭერად ჩატარდა. კრის ბოტმა სახლის გასაღები გელაშვილების მრავალშვილიან ოჯახს თავად გადასცა.
„საქართველოში პირველად არ ვარ. მოხარული ვარ, რომ კიდევ ერთხელ გეწვიეთ. ეს იყო შესანიშნავი საღამო, განუმეორებელი ატმოსფეროთი და მუსიკით. ამ პროექტში მონაწილეობა ჩემთვის დიდი პატივია", - განაცხადა მუსიკოსმა კრის ბოტმა.
