14-16 ოქტომბერს თბილისში მეოთხე რუსულ-ქართული საერთაშორისო მედიაფორუმი („მედია გლობალური კრიზისების კონტექსტში") მიმდინარეობს. ფორუმის ორგანიზატორები არიან რუსული პოლიტოლოგიური ცენტრი „Север-Юг" და არაკომერციული პარტნიორობა „Кавказское сотрудничество".

ორი დღის განმავლობაში წამყვანი მედიის წარმომადგენლები, მედიასფეროს ექსპერტები რუსეთიდან, ისრაელიდან, უკრაინიდან და აზერბაიჯანიდან ქართველი კოლეგებისთვის ტრენინგებსა და მასტერ-კლასებს  მართავენ უახლესი საინფორმაციო ტექნოლოგიების გამოყენებასა და მულტიმედიური კონტენტის შექმნაში. ყურადღების ცენტრშია - ინფორმაციის ტრადიციულ საშუალებათა და „ახალი მედიის" მუშაობის სპეციფიკა გლობალური და რეგიონული კრიზისების პირობებში.

ფორუმის დასკვნით დღეს (16 ოქტომბერს) გამოცხადდება ესეების კონკურსის პირობები, რომლის შედეგების მიხედვითაც სამხრეთ კავკასიის, მათ შორის, საქართველოს საუკეთესო ჟურნალისტებს მიეცემათ შესაძლებლობა, 2014 წლის ბოლოს მიიღონ მონაწილეობა  სამხრეთ კავკასიის ახალგაზრდა ჟურნალისტთა რეგიონულ სკოლაში მოსკოვში.

მეოთხე რუსულ-ქართული მედიაფორუმის დასრულებისას მის მონაწილეებს გადაეცემათ სპეციალური სერტიფიკატები.