შინდისის ბრძოლა 2008 წლის აგვისტოს ომის ერთ-ერთი ყველაზე გამორჩეული ეპიზოდია. 11 აგვისტოს სოფელ შინდისის სარკინიგზო სადგურთან საქართველოს შეიარაღებული ძალების II ქვეითი ბრიგადის საინჟინრო ოცეული უთანასწორო ბრძოლაში ჩაება რუსულ მოტომსროლელ ასეულთან, რომელიც სადგურის ახლოს იყო ჩასაფრებული.  ბრძოლამ დაახლოებით ერთ საათამდე გასტანა, რომლის განმავლობაში მოწინააღმდეგემ ორჯერ გამოიძახა დახმარება. ქართველი ჯარისკაცების მიმართულებით მტერი თითქმის ყველა სახის იარაღიდან ისროდა, მათ შორის ტანკებიდან ( Т-72) და რეაქტიული ცეცხლმტყორცნებიდან.  ჩვიდმეტმა ქართველმა მებრძოლმა წინააღმდეგობა ბოლომდე გასწია და გმირულად დაიღუპა.

შინდისის გმირების სახელთა უკვდავსაყოფად 16-მეტრიანი ბრინჯაოს მონუმენტი შინდისში ზუსტად იმ ადგილზე აღიმართება, სადაც ქართველი ჯარისკაცები 6 წლის წინათ ბრძოლის ველზე დაეცნენ. იგეგმება მათი ბიუსტების დადგმა იმ 17 სოფელში, სადაც ცხოვრობდნენ. მონუმენტსა და ბიუსტებზე  მოქანდაკე ნუგზარ ჭავჭავაძე მუშაობს.

16-მეტრიან ბრინჯაოს მონუმენტს  მოქანდაკე 1 წელიწადში დაასრულებს. პროექტის იდეა მსახიობ ედმონდ მინაშვილს ეკუთვნის.