ადიგენის რაიონის სოფელ მოხეში განვითარებულ მოვლენებთან დაკავშირებით ახალციხის, ტაო-კლარჯეთისა და ლაზეთის ეპარქიის მთავარეპისკოპოსმა, მეუფე თეოდორემ განცხადება გააკეთა.  მისი  ინფორმაციით, სოფელ მოხეში სადავო შენობაში 1595 წელს ეკლესია იყო.

„გურჯისტანის ვილაეთის დიდ დავთარში, 1595 წლისთვის, მოხსენიებულია ზემო და ქვემო მოხე, სადაც დასახლებულები ყოფილან ეთნიკურად ქართველები. ორივე მოხეს ჰქონია თავისი მართლმადიდებლური ეკლესია. სწორედ იმ ადგილას, რომელი შენობაც სადავო გახდა, სამონასტრო კომპლექსი ფუნქციონირებდა. მოგვიანებით კი დაწყებულა ეკლესიების ნგრევა და მეჩეთების მშენებლობა. თუმცა ამ ადგილას არც მეჩეთის მშენებლობა არ დასრულებულა და შესაბამისად მოქმედი მუსლიმური სალოცავი ამ ტერიტორიაზე არასდროს ყოფილა", - აცხადებს მთავარეპისკოპოსი თეოდორე.

სოფელ მოხეში დაპირისპირება 23 ოქტომბერს მოხდა. ადგილობრივი მუსლიმი მოსახლეობა იმ შენობის დემონტაჟს აპროტესტებდა, რომელშიც, მათი თქმით, მეჩეთი იყო. თუმცა, სამცხე-ჯავახეთის მხარეში სახელმწიფო რწმუნებულის განცხადებით, სოფელ მოხეში მდებარე შენობაში მეჩეთი არასდროს ყოფილა და იქ ბიბლიოთეკა გაკეთდება.

სამართალდამცველებსა და მოხეს მოსახლეობას შორის დაპირისპირებისას 14 ადამიანი დააკავეს. 3 დაკავებული ბრალის წარდგენის გარეშე გაათავისუფლეს, 11-ს კი, 250 ლარის გადახდა დაეკისრა.