გოდერძი ჩოხელის მეუღლე ნინო მელაშვილი მწერლის სახელობის ლიტერატურული პრემიის დაარსებას ეხმაურება და „რეპორტიორთან" საუბარში აღნიშნავს, რომ მინიატურის ჟანრის განვითარებაში ამ კონკურსს დიდი მნიშვნელობა ექნება.
„ჩვენი ოჯახისათვის და პირადად ჩემთვის ძალიან სასიამოვნოა, რომ გოდერძის იუბილესთან დაკავშირებით ასეთი ლიტერატურული პრემია დაარსდა. მიმაჩნია, რომ მინიატურის ჟანრის განვითარებაში ამ კონკურსს ძალიან დიდი მნიშვნელობა ექნება. ჩემთვის ორმაგად სასიხარულოა, რომ ეს ყველაფერი გოდერძის სახელთან იქნება დაკავშირებული. მინიატურის ჟანრი საქართველოში ცოტა მივიწყებულია და მე მივესალმები ამ წამოწყებას", - აღნიშნა ნინო მელაშვილმა.
შეგახსენებთ, გოდერძი ჩოხელის სახელობის ლიტერატურული პრემია საქართველოს კულტურისა და ძეგლთა დაცვის სამინისტროს მხარდაჭერით, საერთაშორისო ინკორპორაცია-ქართულ-ამერიკული კულტურის ცენტრ „ამირანის" საქართველოს წარმომადგენლობამ დააფუძნა.
