პოლონეთში ვიზიტის ფარგლებში საქართველოს პრემიერ-მინისტრი ბიძინა ივანიშვილი ქვეყნის სეიმის თავმჯდომარეს შეხვდა. შეხვედრას საქართველოს დელეგაცია სრული შემადგენლობით დაესწრო. ვარშავაში გამართულ შეხვედრაზე მხარეებმა პარლამენტთა შორის ურთიერთობების გაღრმავების საკითხებზე იმსჯელეს.
როგორც ბიძინა ივანიშვილმა შეხვედრაზე აღნიშნა, მნიშვნელოვანია საკანონმდებლო ორგანოებს შორის თანამშრომლობის გააქტიურება. მისივე განცხადებით, საქართველოს მთავრობა დიდ მნიშვნელობას ანიჭებს პოლონეთის გამოცდილების გაზიარებას ევროპული და ევროატლანტიკური ინტეგრაციის კუთხით.
ბიძინა ივანიშვილმა პოლონეთში ვიზიტი დღეს დაიწყო. სეიმის თავმჯდომარესთან შეხვედრამდე ის პოლონელმა კოლეგამ მიიღო.
დღესვე, ბიძინა ივანიშვილი პოლონეთის სენატის მარშალს, ბოგდან ბორუსევიჩს შეხვდა. შეხვედრა პოლონეთის რესპუბლიკის სენატში გაიმართა. მხარეებმა ურთიერთთანამშრომლობის საკითხებზე იმსჯელეს.
