კოსმეტოლოგების თქმით, ზამთარში სახის თბილი წყლითა და საპნით ხშირი დაბანა არც ისე სასარგებლოა. ამას ჯობს, გრილი წყლით დაიბანოთ და შემდეგ  დამატენიანებელი კრემი წაისვათ.

დღეში მინიმუმ 8 ჭიქა სითხე მიიღეთ და კანი რომელიმე მკვებავი ნიღბით გაანებივრეთ.

ზამთარში ძალიან კარგია შვრიის უმარტივესი ნიღბის გაკეთება. 2 სუფრის კოვზ დაფქულ შვრიას იმდენი თბილი რძე დაასხით, რომ სქელი ფაფის მსგავსი მასა მიიღოთ. წაისვით სახეზე, გაიჩერეთ 15-20 წუთი და ჩამოიბანეთ. ბოლოს მკვებავი გადაისვით.

არანაკლებ ეფექტურია ხაჭოს ნიღაბიც: 2 სუფრის კოვზი ხაჭო, 1 კვერცხის გული და ცოტა ლიმონის წვენი კარგად აურიეთ და წინასწარ დაბანილ სახეზე წაისვით.

ასევე კარგია ყოველდღიურად დილა-საღამოს სახესა და ტუჩებზე ყინულის კუბიკების წასმა. ეს სისხლძარღვებისთვის არაჩვეულებრივი ვარჯიშია, რადგან ჯერ ფართოვდება, შემდეგ - იკუმშება. ყინულის მომზადება მინერალური წყლით ან სამკურნალო მცენარეების ნაყენითაც შეგიძლიათ. ცხიმიანი კანისათვის რეკომენდებულია სალბის, სამყურას, ქრისტესისხლას ნაყენი; მშრალისათვის - ვარდის ფურცლებისა და პიონის. მთავარია, არ დაგავიწყდეთ და ყოველი პროცედურის შემდეგ ტენიან კანზე მკვებავი კრემი წაისვით.

წყარო - mshoblebi.ge

(მოამზადა ნათია ცუხიშვილმა)