მთავრობის დღევანდელ სხდომაზე ფინანსთა მინისტრ ნოდარ ხადურის განმარტებით აჟიოტაჟი ჩაცხრა და საბაზრო მექანიზმები საკმარისია იმისთვის, რომ ლარის კურსი სტაბილური იყოს. ღარიბაშვილი დაინტერესდა რატომ არ ჩაერია ეროვნული ბანკი ლარის კურსის დასტაბილურებაში, როგორც ამას აპირებდა. ხადურმა განაცხადა, რომ კვირის განმავლობაში ეროვნულ ბანკს ჯერჯერობით არ მოუწია ჩარევა, ვინაიდან ამის საჭიროება აღარ იყო, რადგან კურსის გამყარების ტენდენცია შეიმჩნეოდა.
მისივე თქმით უნდა აღინიშნოს, რომ რეგიონში ერთ-ერთი ყველაზე სტაბილური მცურავი კურსის ვალუტა არის ლარი.
"ეს აჟიოტაჟი ჩაცხრა და საბაზრო მექანიზმები საკმარისია იმისთვის, რომ კურსი იყოს სტაბილური. უნდა გითხრათ, რომ ვაჭრობის შედეგები პრაქტიკულად უცვლელი რჩება სამი დღის განმავლობაში, ჩარევის გარეშე, რაც უკვე საკმაოდ სერიოზულ იმედს ბადებს იმასთან დაკავშირებით, რომ კურსი მეტად არ შეიცვლება", - განაცხადა ნოდარ ხადურმა.
ეროვნული ბანკის მიერ დადგენილი კურსის თანახმად, 5 თებერვლიდან 1 დოლარის შეძენა 1.9977 ლარად არის შესაძლებელი.
