მსახიობი, საქართველოს სახალხო არტისტი იზა შალვას ასული გიგოშვილი 1938 წლის 16 თებერვალს თბილისში დაიბადა.

1963 წელს დაამთავრა საქართველოს რუსთაველის სახელობის თეატრალური ინსტიტუტის სამსახიობო ფაკულტეტი. 1963-1967 წწ იყო თბილისის რუსთაველის სახელობის თეატრის მსახიობი, 1967-1969 წწ - მარჯანიშვილის სახელობის თეატრის, 1969 წლიდან კი კვლავ რუსთაველის თეატრის. 1997 წელს დააარსა სამეფო უბნის თეატრი.

გიგოშვილის თამაში გამოირჩევა სინატიფით, პლასტიკით, მოხდენილობითა და გარდასახვის უნარით; შექმნა მომხიბლავი და გულწრფელობით აღსავსე თავგანწირულ, შეუპოვარ ქალთა სახეები: ძაბული (კ. გამსახურდიას „მთვარის მოტაცება"), კაბილა (ა. დე მიუსეს „სიყვარული სახუმარო არ არის"), ჰერმია (უ. შექსპირის „ზაფხულის ღამის სიზმარი"), ქსენია (ბ. ლავრენიოვის „რღვევა"), ნატო (ა. ჩხაიძის „ხიდი"), გრუშე ვაჩნაძე (ბ. ბრეხტის „კავკასიური ცარცის წრე"), ზიტა (გ. ლესინგის „ნათან ბრძენი"), შუშანიკი (ი. ცურტაველის „შუშანიკის მარტვილობა"), თამარი (კ. გოლდონის „მშვენიერი ქართველი ქალი") და სხვა.

იზა გიგოშვილი იყო საქართველოს სახალხო არტისტი (1981). 1979 წელს მას მიენიჭა სსრკ სახელმწიფო პრემია.

მსახიობი 2003 წელს გარდაიცვალა. დაკრძალულია მწერალთა და საზოგადო მოღვაწეთა დიდუბის პანთეონში.