ვანო მერაბიშვილის მოადგილე დუმილს არღვევს... პირველად „პრაიმტაიმში" გენერალი ლევან გვაზავა ბოლო დროის გახმაურებულ საქმეებზე საუბრობს. ვის აძლევს ხელს სამართალდამცავი უწყებების დისკრედიტაცია და რა სახის დაპირისპირება არსებობდა სააკაშვილის დროს ძალოვანი უწყების ხელმძღვანელებს შორის? ვინ დგას იური ვაზაგაშვილის აფეთქების უკან და რატომ ფიქრობს გენერალი გვაზავა, რომ კვალი რუსეთის სპეცსამსახურებთან მიდის? ამ ინტერვიუში მკითხველი უშუალოდ ვანო მერაბიშვილის მოადგილისგან შეიტყობს, იყენებდა თუ არა წინა ხელისუფლება შსს-ს დანაყოფებს პოლიტიკური ოპონენტების წინააღმდეგ. სანამ ამ კითხვებზე პასუხებს იხილავთ, მანამდე გეტყვით, რომ გენერალი ლევან გვაზავა ამჟამად ორგანიზაცია „სამართალდამცავთა დაცვის ლიგას" წარმოადგენს, რომლის წარმომადგენლები, მათ შორის კრიმპოლის უფროსის ყოფილი მოადგილე, ირაკლი ფირცხალავა კორტებთან ჩატარებული სპეცოპერაციის გამო სისხლის სამართლის პასუხისგებაში მისცეს. გვაზავა ამ დაპატიმრებებს პოლიტიკურად მოტივირებულს უწოდებს.

- ბატონო ლევან, პირველ რიგში გმადლობთ, რომ დაგვთანხმდით ინტერვიუზე... მოდით, საუბარი დავიწყოთ ყველაზე აქტუალური თემით... რატომ ფიქრობთ, რომ თქვენი თანამოაზრეების, მათ შორის ირაკლი ფირცხალავას დაკავება პოლიტიზებულია? რა გაძლევთ ამის საფუძველს?

- ამის საფუძველს მაძლევს ბრალის დადგენილება, სადაც პირდაპირ ჩაწერეს პოლიტიკური მოტივი. თეთრით შავზე წერია, რომ ეს პირები არიან წინა ხელისუფლების წარმომადგენლები, ლაპარაკობენ ნულოვან ტოლერანტობასა და არეულობაზეო, რაც სრული აბსურდია. ჩვენ არ ვართ ე.წ. 9-წლიანი პოლიციელები. უმეტესი ჩვენგანი ამ სისტემაში 15 წელი და კიდევ უფრო დიდი ხანია მუშაობს. გარდა ამისა, პროკურატურა ბრალის დადგენილებაში პირდაპირ წერს, რომ თითქოს ფირცხალავას აქვს კავშირები საზღვარგარეთ, სავარაუდოდ, უკრაინასთან, იქ მყოფ ძალოვნებთან, აპელირებენ, რაღაც აბსურდულ არეულობაზე და ა.შ. ეს შეიძლება ისაუბროს პოლიტიკოსმა, მაგრამ, როდესაც უცხოურ კავშირებზე წერს პროკურატურა და ამით ასაბუთებს დაპატიმრების აუცილებლობას, სხვა არაფერია, თუ არა ბრალის პოლიტიკური მოტივი.

- რამდენად სწორი იყო სააკაშვილის ხელისუფლების დროს გამოცხადებული ნულოვანი ტოლერანტობა... ხომ არ ფიქრობთ, რომ კრიმინალთან ბრძოლის ამ პოლიტიკამ არ გაამართლა?

- არა, ასე ნამდვილად არ ვფიქრობ. პოსტსაბჭოთა ქვეყნებს შორის საქართველო ითვლებოდა ერთ-ერთ ყველაზე კრიმინალურ და კორუმპირებულ სახელმწიფოდ. კრიმინალური სამყაროს ლიდერების 70 პროცენტი სწორედ საქართველოდან იყო. ისინი აკონტროლებდნენ არამარტო დანაშაულებრივ დაჯგუფებებს, არამედ ქვეყნის ბიუჯეტებს, გავლენა ჰქონდათ პოლიტიკოსებზე, მთავრობებზე და ა.შ. რომ არა ნულოვანი ტოლერანტობა, ამ სატკივარს წელში ვერ გადავტეხდით.

- და ამით ხსნით 2006 წლის 2 მაისის სპეცოპერაციას, რომელსაც ზურაბ ვაზაგაშვილი და ალექსანდრე ხუბულოვი ემსხვერპლნენ?

- ამ კითხვაზე ასე გიპასუხებთ: ჩვენ დავიწყეთ სპეცდანიშნულების რაზმის გადამზადება დასავლეთის განვითარებულ ქვეყნებში. სისტემატურად მიდიოდა მათი ტრენინგები. ბუნებრივია, მათ რაც ისწავლეს, ისე იმოქმედეს. ანუ დაინახეს საფრთხე და გახსნეს საპასუხო ცეცხლი. ნებისმიერი ქვეყნის პოლიცია, მით უმეტეს სპეცრაზმი, ანალოგიურად მოიქცეოდა. ამ დროს პოლიციელებმა დაიცვეს არა მხოლოდ საკუთარი თავი, არამედ იქვე მყოფი მშვიდობიანი მოქალაქეები.

- თუმცა ჩნდება კითხვა - რაში დასჭირდა სპეცრაზმს ასეულობით საბრძოლო ვაზნის გამოყენება?

- როდესაც სპეცოპერაცია ტარდება, იქ ვაზნებს არავინ ითვლის. თითო მჭიდში 30 ტყვიაა, იქ მყოფმა სპეცრაზმელმა, ვინ რამდენი ისროლა, ამის რეგულირება იმ მომენტში წარმოუდგენელია. არსად არ წერია კანონში, ორი ტყვია უნდა ესროლო, თუ ათი. როდესაც ხედავ საფრთხეს, ხსნი ცეცხლს. ეს ელემენტარულია. მაინცდამაინც პოლიციელი უნდა მომკვდარიყო? არ მესმის, რა ლოგიკაა.

- რაც შეეხება იური ვაზაგაშვილის აფეთქებას... როგორ ფიქრობთ, რატომ უნდა მოეკლა დაკავებულ სოსანაშვილს ვაზაგაშვილი?

- ამას მე ვერ გეტყვით, მაგრამ დაზუსტებით შემიძლია, ვთქვა, რომ ვაზაგაშვილის ოჯახის შემდეგ ამ აფეთქებით დავზარალდით ჩვენ - მე და ჩემი მეგობრები. ჩვენ სამართლებრივ დავაში ვიყავით იური ვაზაგაშვილთან, საქმე სწორედ იქით მიდიოდა, რომ ეს სამოქალაქო დავა ჩვენს სასარგებლოდ დასრულებულიყო. სწორედ იური ვაზაგაშვილის აფეთქების შემდეგ სასწრაფოდ დაკითხეს კორტების სპეცოპერაციის საქმეზე არაერთი პირი და პრაქტიკულად ამას მოჰყვა ფირცხალავასა და სხვა ჩვენი მეგობრების დაკავება. ვსვამ ელემენტარულ კითხვას - რაში გვაწყობდა ჩვენ ვაზაგაშვილის აფეთქება? რაც შეეხება სოსანაშვილს, პირადად არ ვიცნობ. მასთან ახლო შეხება არც ფირცხალავას ჰქონია. ჩვენ ვიცნობდით, როგორც ერთ რიგით პოლიციელს. ამ აფეთქების შემდეგ სასწრაფოდ დაიწყო კორტების საქმის შეკერვა. მინდა გითხრათ, რომ ის პროკურორები, ვინც ამ საქმეს კერავენ, ადრე თუ გვიან, კანონის წინაშე აგებენ პასუხს. საზოგადოებაც მალე მიხვდება ყველაფერს.

- მაშინ იქნებ გვითხრათ თქვენეული ვერსია... ვის აძლევდა ხელს ვაზაგაშვილის მოცილება?

- მოდით, პირდაპირ გეტყვით - ჩემი აზრით, ეს ყველაფერი ხელს აძლევდა იმ ხალხს, ვინც ახლა გამოვარდა და წინა ხელისუფლებასთან ერთად ლანძღავს მოქმედ პოლიციელებსაც. ესენი არიან პრორუსული ძალები. დღეს ეს ხალხი ხელს იშვერს პოლიციისკენ, როგორც ყოფილი, ისე მოქმედი თანამშრომლებისკენ. აქვეყნებენ სხვადასხვა სიებს, უწოდებენ მკვლელებს და ავრცელებენ ათასგვარ სიბინძურეს. ეს არის ძირითადად ის ხალხი, ვისაც არ აწყობს ქვეყანაში ძლიერი პოლიცია, ძლიერი სამართალდამცავი სტრუქტურები და ყველანაირად ძირს უთხრიან ამას. შეიძლება, ვინმე კონკრეტულმა პოლიციელმა რაღაც ჩაიდინა და მან აუცილებლად უნდა აგოს პასუხი, მაგრამ მთელი ის კამპანია, რომელიც ახლა გაჩაღებულია პოლიციის წინააღმდეგ, ემსახურება მხოლოდ ჩვენი ქვეყნის მტრის მიზნებს. ხელისუფლებამ უნდა გაარკვიოს, ვისგან ფინანსდებიან ეს ჯგუფები და ვის ინტერესებს ატარებენ.  გულახდილად გეტყვით, თუ ამ თემას დაუკავშირდა ჭიკაიძის განთავისუფლებაც, ძალიან შეცდნენ. თუ რომელიმე ჩვენგანი დამნაშავე იქნებოდა, ჭიკაიძე ნამდვილად ვერ დაგვიცავდა.

- პირადად იცნობთ ჭიკაიძეს?

- ის ჩემზე გაცილებით პატარაა, მაგრამ კარგად ვიცნობდი მის ოჯახს - მამამისსა და ცხონებულ დედამისს, რომელიც ახლახან გარდაიცვალა. მამამისი წლების განმავლობაში პოლიციაში მუშაობდა და ძალიან დიდ პატივს ვცემდი. ჭიკაიძეც უწესიერესი ახალგაზრდაა და როგორც ვიცი, მას დღესაც პატივს სცემს მთელი პირადი შემადგენლობა.

- ახალ მინისტრზე რა აზრის ხართ?

- ბედის ირონიაა, რომ ვახო გომელაური მოხვდა ბიძინა ივანიშვილთან, რადგან შესაძლოა, კორტებთან სწორედ ეგ ყოფილიყო. გომელაურიც სპეცრაზმში მუშაობდა და ისევე ასრულებდა მისთვის დაკისრებულ მოვალეობებს, როგორც ის ბიჭები, რომლებიც ახლა ციხეში გამოკეტეს. მე ვფიქრობ, მას ნამდვილად გული შესტკივა ბიჭებზე და ჩემი ვარაუდით, რაღაც სახით თანადგომას გამოხატავს იმ სპეცრაზმელების მიმართ, რომლებიც არაფერ შუაში არ არიან.

- ცოტა ხნის წინ პატიმრობიდან განთავისუფლდა ემზარ კვიციანი... თქვენ იყავით პოლიციის ის მაღალჩინოსანი, რომელმაც კოდორში იმ ცნობილი მოვლენების დროს პირველად გაისროლა ჰაერში, რასაც მეორე მხრიდან მოჰყვა შეიარაღებული იერიში... ყოველ შემთხვევაში ასე წერია საქმის მასალებში, რომელიც ჯერჯერობით ეჭვქვეშ ოფიციალურად არავის დაუყენებია... რამდენად ადეკვატურად მოქმედებდა მაშინ ხელისუფლება?

- დიახ, პირველი ჯგუფი ვიყავით, რომლებიც კოდორში შევედით. გზად დაგვაწიეს ინფორმაცია,  რომ იქ კვიციანი და მისი ხალხი იყვნენ ჩასაფრებულები. ვანო მერაბიშვილი და ოქრუაშვილი ერთად ისხდნენ მანქანაში, მათ არ აცადეს სპეცრაზმს და თვითონვე წავიდნენ წინ. ამიტომ ჰაერში მოვახდინე გასროლა, რომ ესენი შემეჩერებინა, რადგან ვფიქრობდი, რომ ღონისძიება სპეცრაზმს უნდა ჩაეტარებინა. ამას მოჰყვა ცეცხლის გახსნა მეორე მხრიდან. საბოლოოდ, კვიციანი გაიქცა და გადავიდა აფხაზეთში, შემდეგ უკვე თქვენთვისაც ცნობილია, რა განცხადებებს აკეთებდა ის რუსულ ტელეარხთან.

- ამბობენ, რომ შემდეგი გახმაურებული საქმე, რომელსაც პროკურატურა გახსნილად გამოცხადებს, სვანეთში ჩატარებულ სპეცოპერაციას უკავშირდება... მართალია პირადად თქვენ აფრასიძეების წინააღმდეგ განხორციელებულ ოპერაციაში არ მონაწილებდით, მაგრამ უშუალოდ ხელმძღვანელობდით გვამების „აღმოჩენის" ოპერაციას... ცნობილია, რომ სამარხების გახსნის შემდეგ იქ ლევან კალაძისა და ერთ-ერთი გატაცებული გოგონას ცხედრების ნაცვლად, მე-19 საუკუნის ნეშტები დაგხვდათ...

- ვაღიარებ, რომ ეს იყო ნაჩქარევი განცხადება, რადგან გვქონდა ინფორმაცია, რომ სწორედ იქ უნდა ყოფილიყო კალაძის ცხედარი. სამწუხაროდ, ეს ინფორმაცია მცდარი აღმოჩნდა. ერთ-ერთმა დაკავებულმა, რუსეთის მოქალაქე მურავიოვმა გვაცნობა, რომ მას ნამდვილად ჰყავდა ლევან კალაძე ნანახი აფრასიძეებთან.  ეს მასალები მანამდეც იყო შსს-ში და ამიტომაც გვინდოდა ინფორმაციის გადამოწმება. შემდეგ დავრწმუნდით, რომ ეს პიროვნება სასჯელის შემსუბუქების მიზნით ცდილობდა თანამშრომლობას, რამაც პრაქტიკულად მცდარ კვალზე დაგვაყენა.

(

- თქვენ იყავით ვანო მერაბიშვილის მოადგილე... შეგიძლიათ გვითხრათ, რა იყო იმდროინდელი შსს-ს მთავარი პრობლემა?

- მიმაჩნდა და დღესაც მიმაჩნია, რომ ისეთი უწყება, როგორიც არის შინაგან საქმეთა სამინისტრო,პოლიტიკური აქტივით არ უნდა დააკომპლექტო. გაუგებარია, რატომ უნდა ყოფილიყვნენ სისტემის სათავეში „კმარას" წარმომადგენლები. ეს თავისთავად ახდენდა უწყების პოლიტიზებას. ეს არის, როგორც წინა, ისე ახლანდელი ხელისუფლების შეცდომა. ყველამ თავი უნდა დაანებოს პოლიციას და პროფესიონალებს მისცენ მუშაობის საშუალება. შეცდომად ვთვლი, რომ თავის დროზე ძალიან დიდი ძალაუფლება მისცეს კუდ-სა და სოდ-ს. სამწუხარო რეალობაა და,ალბათ, ყველა აღიარებს, რომ გარკვეულწილად ხდებოდა ამ სამსახურების პოლიტიკური ნიშნით გამოყენება. როდესაც „ნაციონალური მოძრაობა" მოვიდა ხელისუფლებაში მაშინვე დაიწყო იმის გამოკვლევა - რამდენი პატიმარი გადმოყარეს შევარდნაძის დროს ფანჯრებიდან. გახსოვთ, ალბათ, რომ ეს თემა სულ მუსირებდა - აი, დაკავებულებს შსს-ს შენობიდან ყრიან და ა.შ. აღმოჩნდა, რომ სულ ორი შემთხვევა იყო, როდესაც მართლა გადმოვარდნას ჰქონდა ადგილი და იქ არაფერი, გარდა გაქცევის მცდელობისა, არ ყოფილა. ეს რომ ნახეს, გაჩუმდნენ და ხმა აღარავის ამოუღია. ახლა დაახლოებით მსგავსი შინაარსის თემებით საქმეებს კერავენ და არავინ კითხულობს, რეალურად მოხდა თუ არა მსგავსი რამ.  საბოლოო ჯამში, პოლიციელების ტალახში ამოსვრა სარგებელს არავის მოუტანს.

- არსებობდა დაპირისპირება ძალოვანი უწყების პირველ პირებს შორის?

- ჩვენ, პოლიციელები, ამას დიდ ყურადღებას არ ვაქცევდით, მაგრამ, რა თქმა უნდა, გავლენების განსამტკიცებლად დაპირისპირებებს ადგილი ჰქონდა.

 მირიან ბოქოლიშვილი

გაზეთი „პრაიმტაიმი"