„საეჭვოა, იური ვაზაგაშვილის მკვლელობა ბოლომდე გაიხსნას, რადგან ასეთი საქმეები ძალზე რთული გასახსნელია. სავარაუდო მკვლელი კი დააკავეს, მაგრამ იგი დანაშაულს არ აღიარებს, უფრო მეტიც დუმილის უფლებას იყენებს, სააკაშვილის რეჟიმისეული წესებით ხომ არ ვიმოქმედებთ, რომ ნებისმიერ ფასად გამოვძალოთ სასურველი ჩვენება? ეს ყველაფერი პროფესიონალურ დონეზე იყო დაგეგმილი და შესრულებული, ამიტომაც მიჩნდება დიდი ეჭვი, რომ აქ მესამე ძალაა ჩართული, რომელსაც მოსახლეობაში უკმაყოფილების გამოწვევა სურს", - აცხადებს „საერთო გაზეთთან" საუბარში პოლიციის ვიცე-პოლკოვნიკი დავით გაგნიძე:
- უკვე აშკარად ჩანს ნიშნები, რომ „არაბული გაზაფხულის" მოწყობა უნდათ, არეულობას ვგულისხმობ, ხალხის უკმაყოფილება ისედაც პიკს აღწევდა, ამ დროს კლავენ ადამიანს, რომელიც ამდენი წელი სამართლიანობის დამკვიდრებისთვის იბრძოდა. ეს პერიოდი ძალიან მაგონებს 2001-03 წლებს, როდესაც შევარდნაძის ხელისუფლებიდან ჩამოცილება უნდოდათ, ყველაფერს აკეთებდნენ, რომ საზოგადოებაში პროტესტის ტალღა გაზრდილიყო. არც ლარის გაუფასურება მიმაჩნია შემთხვევით მოვლენად, მუდამ იმას გვიმტკიცებდნენ, ლარი დოლარზეა გადაჯაჭვულიო, თუ ასეა, მაშინ დოლარის გამყარების პარალელურად ლარი რატომ უფასურდება? ინფლაციის გამომწვევი ობიექტური მიზეზები, რა თქმა უნდა, არსებობს, მაგრამ ლარის ასეთი გაუფასურება მაინც ხელოვნურად გამოწვეული მგონია. მე არც ის მგონია შემთხვევითი, რუსმა ჯარისკაცმა სომხეთის ქალაქ გიუმრიში მთელი ოჯახი რომ ამოწყვიტა, გამორიცხულია, ამ ყველაფერში რუსეთის ხელი ერიოს, რუსები გიჟები ხომ არ არიან, რომ საკუთარ თავს ასეთი რამ მოუწყონ, მით უმეტეს, რომ სომხეთი კავკასიაში მათი ყველაზე ერთგული მოკავშირეა. ე.ი. ის ძალები ცდილობენ ამის გაკეთებას, ვისაც კავკასიაში სტაბილიზაცია, კავკასიელების ერთიანობა არ აწყობთ. სხვათა შორის, კავკასიის ერთიანობის მთელ მსოფლიოს ეშინოდა. კონკრეტულად რომელ ძალას აწყობს საქართველოში სიტუაციის არევა, უპირველესად ეს უნდა გავარკვიოთ, რომლის საბოლოო მიზანიც რეგიონის ქვეყნებში საკუთარი ინტერესების გამტარაბელი ხელისუფლების მოყვანაა. ეს რუსეთი ნამდვილად არ არის.
- იური ვაზაგაშვილის მკვლელობაში შურისძიების მოტივს გამორიცხავთ? კორტებთან ჩატარებული სისხლიანი სპეცოპერაციის დროს თქვენ შსს-ში მუშაობდით, საინტერესოა, მაშინ რა ხმები დადიოდა უწყების შიგნით?
- სიმართლე გითხრათ, მეეჭვება, რომ ეს მკვლელობა შურისძიების გამო მომხდარიყო, ვგულისხმობ მხოლოდ ირაკლი ფირცხალავას მონაწილეობას. მთლად უჭკუო უნდა იყოს ადამიანი, თუ ამ მოტივით გააკეთა, მაგრამ ერთ-ერთ ვერსიად ესეც უნდა განიხილებოდეს. იური ვაზაგაშვილის მკვლელობა გლობალურi პოლიტიკის შედეგია, ისევე, როგორც გიუმრიში მომხდარი ტრაგედია და საბოლოო ჯამში მოსახლეობაში უკმაყოფილების გამოწვევას ისახავს მიზნად. ახლა რაც შეეხება ე.წ. კორტების სპეცოპერაციას, იმ პერიოდში სოდ-ში ვმუშაობდი. სამინისტროში ხმები დადიოდა, რომ თითქოს ზურა ვაზაგაშვილი, ხუბულოვი და ფუთურიძე საყაჩაღოდ მიდიოდნენ, თუმცა სამინისტროს ხელმძღვანელობას კარგად მოეხსენებოდა, რომ არ დავიჯერებდით ამ ვერსიას. თუ ისინი მართლაც საყაჩაღოდ მიდიოდნენ, დაეცლიათ, მისულიყვნენ ადგილამდე, იქ აეყვანათ, რა საჭირო იყო ამხელა სისხლიანი დაპირისპირება. რამდენადაც ვიცი, პოლიციელებს ამ ბიჭების დახოცვა არ უნდოდათ, თუმცა დავალება ჰქონდათ, რომ მკაცრად მოქცეულიყვნენ. საქმე იმაშია, რომ ოპერაციაში მონაწილე პოლიციელები შედარებით ჩამოუყალიბებელი ოპერატიული თანამშრომლები იყვნენ, ყველა არა, მაგრამ უმეტესობა მაინც. ეს იყო შემთხვევითი ხალხი, რომელსაც არავითარი გამოცდილება არ ჰქონდა, მისცეს იარაღი და გაუშვეს ასეთ საპასუხისმგებლო ღონისძიებაზე. ჩემი ინფორმაციით, იქ ერთ-ერთ თანამშრომელს ავტომატი შემთხვევით გაუვარდა (მისი ვინაობის გამხელისგან თავს შევიკავებ), დანარჩენებს ეგონათ, რომ სპეცოპერაცია დაიწყო და ყველამ გახსნა ცეცხლი. მერე იმიტომ ამტკიცებდნენ, პირველად ვითომ ვაზაგაშვილის ავტომანქანიდან გვესროლეს და იძულებული გავხდით, გვეპასუხაო. ძალიან მაინტერესებს, სად იყო ამ დროს მათი ხელმძღვანელობა? ირაკლი ფირცხალავა კრიმინალური პოლიციის დეპარტამენტის უფროსის მოადგილე იყო, გიორგი ცააძე - სამძებრო სამმართველოს უფროსის მოადგილე, სად იყვნენ ამ სამსახურების უფროსები, არცერთი არ მისულა შემთხვევის ადგილზე სპეცოპერაციის დამთავრების შემდეგაც, რაც ჩემში დიდ ეჭვებს ბადებს.
იარაღის შემთხვევით გავარდნა სხვა დროსაც ყოფილა, მაგრამ გამოცდილი თანამშრომლები პირველი იმას ვარკვევდით, სინამდვილეში რა მოხდა, როგორ შეიძლება მასიურად ცეცხლის გახსნა, მაგრამ ვიმეორებ, გამოუცდელი თანამშრომლები იყვნენ და იმიტომ დაემართათ. ვერაფრით გავარკვიე, რატომ იღებს ირაკლი ფირცხალავა ყველაფერს თავის თავზე, ეჭვი მიჩნდება, რომ ვიღაცებს შეგნებულად იფარავს. შეიძლება, ვინმემ თქვას, დავით გაგნიძე ყოფილი პოლიციელია და კოლეგებს იცავსო, მაგრამ მერწმუნეთ, ასე არ არის, სიმართლე მინდა გაირკვეს.
- ირაკლი ფირცხალავას სიტყვებს თუ ვერწმუნებით, კორტების სპეცოპერაცია მას დაუგეგმავს.
- თუ მან დაგეგმა, მაშინ ამ სპეცოპერაციას უნდა ჰქონდეს თავისი გეგმა, რომელზეც მისი უშუალო ხელმძღვანელი უნდა აწერდეს ხელს, სად არის ეს გეგმა? ასეთ სარისკო ოპერაციას მარტო მოადგილე ვერ დაგეგმავ, ხელმძღვანელთან ერთად უნდა დაგეგმო და სპეცოპერაციას ისიც უნდა ესწრებოდეს, თუ ლიკვიდაციაზე მიდგა საქმე, ეს ოპერაცია უკვე შს მინისტრის, მინიმუმ მინისტრის მოადგილის დონეზე იგეგმება. პროკურატურის ოფიციალური ვერსიაშიცაა საუბარი ამ სპეცოპერაციასთან დაკავშირებით, ამიტომაც ვამბობ, რომ ფირცხალავას უშუალო ხელმძღვანელობის პასუხისმგებლობის საკითხიც უნდა დადგეს, რომლებიც ფირცხალავაზე უფრო მკაცრად უნდა დაისაჯონ. ან საერთოდ ვინ დაუქვემდებარა ფირცხალავას თბილისის სპეცდანიშნულების რაზმი, კი იყო იგი კრიმინალური პოლიციის უფროსის მოადგილე, მაგრამ მას უფლება არ ჰქონდა, ეს რაზმი გამოეყვანა მინისტრის ან მისი მოადგილის გარეშე. თუ ერთობლივი სპეცოპერაცია იყო, მაშინ სად იყო თბილისის პოლიციის მთავარი სამმართველოს კონტინგენტი, მარტო სპეცრაზმი რატომ იყო იქ, სად არის ეს ერთობლივი გეგმა? აქ რაღაც ძალზე დიდი გაურკვევლობაა. თუ ეს გეგმა არ არსებობს, მაშინ ფირცხალავას ხელმძღვანელობას უმკაცრესად უნდა მოსთხოვონ პასუხი, მარტო ფირცხალავა რა შუაშია? გაიხსენეთ იური ვაზაგაშვილის სიტყვები, ის ფირცხალავას ზემდგომებსაც ასახელებდა, სად არის ეს ხალხი, ეს ხომ არ ნიშნავს, რომ მხოლოდ ერთი ბარტყი გადმოაგდეს? ბატონი იური ცოცხალი რომ ყოფილიყო, მარტო ამ 11 კაცის დაჭერით არ დაკმაყოფილდებოდა. თუ ფირცხალავამ ხელმძღვანელობა დაარწმუნა და გაუშვეს ამ ბინძურ საქმეზე, ხელმძღვანელობაც პასუხისმგებლობას იღებს საკუთარ თავზე. თუ პასუხისმგებლობას იღებენ, მაშინ კეთილი უნდა ენებათ და მაშინვე უნდა მისულიყვნენ კორტებთან, მით უმეტეს, რომ ორი ადამიანი დაიღუპა და ერთი მძიმედ დაიჭრა, რატომ არავინ მივიდა შემთხვევის ადგილზე, ეს ხომ არ ნიშნავს, რომ წინასწარ იცოდნენ, რაც მოხდებოდა იქ და ჩირგვებში დაიმალნენ? სხვა დასკვნას ვერ გამოიტან.
კორტების სპეცოპერაციასთან დაკავშირებით სპეცრაზმელებიც დააკავეს, მე დაზუსტებით არ ვიცი, მათ რა ბრალდება აქვთ წაყენებული, მაგრამ სპეცრაზმელი შემსრულებელია, როცა ხედავს, ისვრიან, თვითონაც უნდა ისროლოს. შეურაცხყოფას არავის ვაყენებ, მაგრამ ჩვენ მათ რობოტებს ვეძახდით, რასაც ოპერთანამშრომელი ეტყვის, ის უნდა შეასრულოს. ოპერთანამშრომელმა უნდა ჩაუტაროს თავიდანვე ინსტრუქტაჟი, მე მიყურეთ, უჩემოდ არაფერი გააკეთოთო. თუ ოპერთანამშრომელმა არაფერი უთხრა, სპეცრაზმელს რა უნდა მოთხოვო, გასაგებია, რომ ხალხი დაიხოცა, კი ჩაიდინეს დანაშაული, მაგრამ რა ბრალდება უნდა წაუყენო? სპეცრაზმის უფროსს შეიძლება მოსთხოვო პასუხი, მაგრამ სპეცრაზმელები ხელმძღვანელის დანაშაულებრივ საქციელს შეეწირნენ. ფირცხალავამ თავისი ძმის დაპატიმრების გამო შური იძიაო, არც ამ ვერსიის მჯერა, ამის გულისთვის კაცს არავინ მოკლავს, ვერც ფირცხალავა მოკლავდა, მით უმეტეს, თუ როგორც ამბობენ, ხუბულოვი სოდ-ის აგენტი იყოო. დავუშვათ, ხუბულოვი მართლაც იყო აგენტი, კოდუას ან დათა ახალაიას აგენტს ვიღაც ფირცხალავა როგორ მოკლავდა, ეს ხომ სასაცილოა. კოდუას და ვანო მერაბიშვილის ურთიერთობის შესახებ ფირცხალავას როგორ შეიძლებოდა არ სცოდნოდა, ფირცხალავას ხელმძღვანელობას კოდუა ამ სპეცოპერაციის შესახებ საქმის კურსში რომ არ ჩაეყენებინა, გამორიცხულია. ნაცრეჟიმმა თავისი არაპროფესიონალიზმის, გარეწრობისა და იდიოტობის გამო 160-ზე მეტი ადამიანი შეიწირა, რომლებიც ქუჩაში ჩახოცეს. პროფესიონალი სამართალდამცავები ერთი ხელის მოსმით ქუჩაში გაყარეს, ახალ კადრებს ჭკუის დამრიგებელიც არავინ ჰყავდა, რომ ეთქვა, რას აკეთებთ, ხალხთან გაქვთ საქმე და არა ცხოველებთანო. ეს იყო უბედურება და შედეგიც მიიღეს, თუმცა მათ რა, ჩვენმა ხალხმა ზღო, ესენი მოიხდიან სასჯელს და გათავისუფლდებიან, იმ დახოცილებს რა ეშველებათ?
- თავიდან ხომ ამბობდნენ, იქ მეოთხე პირიც იყოო, მერე სად გაქრა ის პირი?
- რამდენადაც ვიცი, ის მეოთხე პირი ამბობდა, რომ ამათ საერთოდ არ იცნობდა, მერე იძულებით რა ათქმევინეს, ვერ გეტყვით. მიდიოდნენ კი ეს ბიჭები საყაჩაღოდ, შეიძლება თქვეს კიდეც, საყაჩაღოდ მივდივართო, მაგრამ სინამდვილეში რესტორანში მიდიოდნენ. რაში სჭირდებოდათ სამი კაცის ასაყვანად სპეცრაზმი, ოპერთანამშრომლები არ ეყოფოდნენ? პოლიციის თითო განყოფილებას 15 ოპერთანამშრომელი მაინც ჰყავს, მაგრამ პიარს იკეთებდნენ, რომ ისეთი სახელმწიფო ააშენეს, სადაც ყველა რგოლი გამართულად მუშაობდა, თუმცა შემთხვევით გავარდნილმა ტყვიამ ყველაფერი წყალში ჩაუყარა. ე.წ. საკონტროლო გასროლებსაც მათ მეტიჩრობას დავაბრალებ, ესეც ვიღაცის წინაშე თავის გამოსაჩენად უნდოდათ, ახლა კი უარყოფენ, მაგრამ სატელევიზიო კადრებში ხომ აშკარად ჩანს და ექსპერტიზამაც დაადასტურა. მე ღრმად ვარ დარწმუნებული, სპეცრაზმი რომ არ წაეყვანათ, ეს ტრაგედია არ მოხდებოდა, ავტომატები სპეცრაზმს ჰქონდა და შემთხვევით სწორედ ავტომატი გავარდა, მაგრამ ეს შემთხვევითობა სულაც არ ამსუბუქებს მათ პასუხისმგებლობას. მერე ისიც თქვეს, რომ თითქოს იმ ბიჭებს იარაღი (პისტოლეტი) ჰქონდათ, დანამდვილებით ვიცი, რომ მათ იარაღი არ ჰქონიათ.
გინდა თუ არა, იქამდე მიდიხარ, რომ ეს იყო სისტემური დანაშაული, 2004 წელს პროფესიონალები მასობრივად გაყარეს სტრუქტურიდან, მოიყვანეს შემთხვევითი ხალხი, რომლებმაც ცეცხლსასროლი იარაღი პირველად ნახა, ხოლო სააკაშვილმა მათ განუსაზღვრელი ძალაუფლება მისცა და მოუწოდა, ხელი არ აგიკანკალდეთ, ისე ესროლეთო. ნებისმიერ გამოუცდელ, უცოდინარ პიროვნებას იგივე რეაქცია ექნებოდა, რაც ამ პოლიციელებს ჰქონდათ. ამიტომ სააკაშვილის დროინდელი არცერთი თანამდებობის პირი არ უნდა მუშაობდეს სამართალდამცავ სტრუქტურაში, რადგან კიდევ დიდ უბედურებებს დაატრიალებენ, განა იმიტომ, რომ ცუდი ბიჭები არიან, უბრალოდ, შეჩვეულები არიან ამას. ნაციონალებმა ფულით იყიდეს მათი სულები და უკიდურესად გაათავხედეს. დაუსჯელობის სინდრომი ყოველთვის იყო პოლიციაში, მაგრამ სააკაშვილის მმართველობისას, განუსაზღვრელ მასშტაბებს მიაღწია. 25 წელი ვატარებდი იარაღს, მაგრამ ჩემმა მეზობლებმაც კი არ იცოდნენ, ჩვენ იარაღს ვმალავდით, ესენი კი არაფერს ერიდებოდნენ, მიხვდნენ, ყველაფრის უფლება ჰქონდათ. მერაბიშვილის მინისტრობისას პოლიციის ერთ-ერთი დიდი თანამდებობის პირი ჰყვებოდა, სადღაც (რესტორანთან თუ სახლთან) ვიდექით და ვდარაჯობდით, არც ვიცოდით, შიგნით ვინ იყო, უცებ ვანო მერაბიშვილი გამოვიდა, ბიჭებო, აქ ასე როგორ ხართ, წამოდითო, შეგვიყვანა ყველა და გვაქეიფა, აი, ვინ არის კაციო. მაშინ ვუთხარი, რომ სწორედ ეს იყო ქვეყნის უბედურება, რომ პიროვნებას ხედავდნენ, მას ემსახურებოდნენ და არა ხალხს. გახსოვთ ალბათ, პოლიციელები ხალხს რომ ესროდნენ და თან „მიშა-მიშას" ყვიროდნენ. პოლიციელი რომ „მიშა-მიშას" დაიყვირებს, იმის სისტემაში გაჩერება როგორ შეიძლება. დღევანდელმა ხელისუფლებამ თუ არ იცის მიტინგების დამრბევ პოლიციელთა ვინაობა, ამის გარკვევა სულ ადვილია, ჩაიხედონ კადრების სამმართველოს მიერ მომზადებულ ბრძანებებში, ვის როდის აქვს პრემიები მიღებული და მიხვდებიან. ვიცი, ჩემი ამ განცხადებით ბევრ ადამიანს გავანაწყენებ, მაგრამ სიმართლე უნდა ითქვას, ისინი ასე ვთქვათ, ფსიქოლოგიურად დაზიანებული ხალხია და ასეთ ადამიანებს იარაღი არ უნდა მისცე ხელში, რადგან ისინი პიროვნებას (სააკაშვილს, მერაბიშვილს და ა.შ.) ემსახურებიან და არა ქვეყანას და ხალხს, წინააღმდეგ შემთხვევაში ამდენი გვამები არ იქნებოდა. ნაციონალებს რომ ჰკითხო, მათი მმართველობისას დანაშაული აღარ ხდებოდა, კრიმინალი როგორღა მოხდებოდა, როცა ყველა კრიმინალი ხელისუფლებაში და მთავრობაში იჯდა.
მანანა სუხიშვილი
გაზეთი „საერთო გაზეთი"
