საქართველოს საპატრიარქოს საგარეო განყოფილების ხელმძღვანელმის, ზუგდიდისა და ცაიშის მიტროპოლიტის გერასიმე შარაშენიძის განცხადებით, რუსეთის ნათლისღების 1025 წლისთავთან დაკავშირებით, სრულიად საქართველოს კათოლიკოს-პატრიარქი ილია II ხვალ რუსეთს ეწვევა. საიუბილეო ღონისძიებები მოსკოვში, კიევსა და მინსკში გაიმართება.
პატრიარქი დელეგაციის წევრებთან ერთად 23-30 ივლისს სამივე ქალაქში ჩაბრძანდება. "იქნება საუბარი იმ თემებზე, რომელიც ყოველთვის საქართველოსა და რუსეთის ეკლესიებს შორის არის. პირველი ეს არის აფხაზეთის თემა და ქართველი მეფეების ნეშთების გადმოსვენება", _ დასძინა საქართველოს საპატრიარქოს საგარეო განყოფილების ხელმძღვანელმა.
მეუფის განმარტებით, დელეგაციის წევრები რუსეთის პატრიარქს შეხვდებიან. რუსეთის ხელისუფლების პირველი პირების შეხვედრების შესახებ ინფორმაცია კი ჯერ დაზუსტებული არ არის. შეხვედრებზე დაზუსტდება ასევე ასტრახანიდან ქართველი მეფეების: ვახტანგ VI-სა და თეიმურაზ II-ის გადმოსვენების საკითხიც.
