საქართველოს ბანკების ასოციაციის ხელმძღვანელმა ზურაბ გვასალიამ საქართველოში შექმნილ ეკონომიკურ ვითარებაზე პირველი კომენტარი გააკეთა. როგორც გვასალიამ ჟურნალისტებთან საუბრისას აღნიშნა, უნდა მოხდეს აჟიოტაჟის შეწყვეტა და მთავრობას, მის ეკონომიკურ გუნდსა და ეროვნულ ბანკს მშვიდად მუშაობის საშუალება მიეცეს.
„დღეს მთავარი არის ის, რომ მიეცეს მშვიდად მუშაობის საშუალება ეროვნულ ბანკს, მთავრობას, ეკონომიკურ გუნდს. რათა მათ მიეცეთ საშუალება, განსაზღვრონ და გაანალიზონ, თუ რა ხდება ქვეყანაში და შესაბამისი ზომები მიიღონ. ეს იქნება მესიჯი ინვესტორებისთვის, რომ საქართველოში გარემო არის მართვადი",- აცხადებს ზურაბ გვასალია.
გვასალია მიიჩნევს, რომ იმ შემთხვევაში, თუ მთავრობა დამატებით საგარეო ვალს აიღებს, ეს არ იქნება პრობლემა. მისი განმარტებით, მთავარია, სად დაიხარჯება აღნიშნული თანხა.
„ძალიან მნიშვნელოვანი იქნება სავალუტო ფონდის შეფასებები და რეკომენდაციები. ის, რომ მთავრობა იღებს ვალს, ამაში კატასტროფა არ არის, მთავარია, სად დაიხარჯება ეს თანხები და რამდენად სწორად", - განაცხადა ზურაბ გვასალიამ.
