საქართველოს პრეზიდენტმა მიხეილ სააკაშვილმა ტექნიკურ უნივერსიტეტთან საპრეზიდენტო ბიბლიოთეკის მშენებლობა მოინახულა. მან დიპლომატი გელა ჩარკვიანი წმინდა გიორგის ორდენით დააჯილდოვა და განაცხადა, რომ განათლებისადმი სიყვარული მას, სწორედ ჩარკვიანმა გადასცა.
„მან გაზარდა მთელი თაობები თავისუფლების, დემოკრატიის და ლიბერალიზმის სულისკვეთებით მაშინ, როცა ეს სამი სიტყვა იყო ძალიან საშიში და არამოდური იმ ქვეყანაში, რომელშიც ჩვენ ვცხოვრობდით და რომელშიც თქვენ არ გიცხოვრიათ. იმედია, არ იცხოვრებთ ისე, როგორც ევრაზიულ კავშირში, არც - არმენიზებულ საგარეო პოლიტიკის მქონე საქართველოში. ჩვენ ვიცხოვრებთ ევროპაში"-განაცხადა პრეზიდენტმა.
პრეზიდენტმა ბიბლიოთეკის მიმდინარე მშენებლობაზეც ისაუბრა და აღნიშნა, რომ ეს ბიბლიოთეკა ფინანსების სიმცირის გამო, ისეთივე გარნდიოზული ვერ იქნება, როგორიც მაგალითად, ამერიკის ბიბლიოთეკაა.
„ამ ბიბლიოთეკის მშენებლობა თავიდან დავიწყე ოჯახის წევრების დახმარებით. როცა ჩემი პრეზიდენტობის ვადა ამოიწურება, ვაპირებ რამდენიმე ქვეყანა მოვიარო, შევხვდე სერიოზულ ბიზნესმენებს და იმედი მაქვს, რამდენიმე თვეში შევძლებ საკმარისი ფულის მობილიზებას რომ ის დავამთავროთ"-ამბობს სააკაშვილი.
მიხეილ სააკაშვილის განცხადებით, საპრეზიდენტო ბიბლიოთეკა არქიტექტურის, დიზაინის და პოლიტიკურ მეცნიერებათა ბიბლიოთეკა იქნება, რომელშიც უკვე 5000-მდე წიგნია განთავსებული. ქვეყნის პირველი პირის ინფორმაციით, ბიბლიოთეკაში ზვიად გამსახურდიას და ედუარდ შევარდნაძის კუთხეებიც იქნება.
