სამი სასულიერო პირის პენსიაზე გასვლის ფაქტს საქართველოს საპატრიაქროში არ ადასტურებენ. წმინდა სინოდის მიერ გავრცელებულ განცხადებაში ნათქვამია, რომ ორი მღვდელმთავარი მეუფე თედეოზი და მეუფე დავითი ეპარქიების გარეშე განაგრძობენ მოღვაწეობას. ხოლო, მეუფე ვახტანგ ახვლედიანი შვედეთის სამრევლოზე იზრუნებს. წმინდა სინოდის გადაწყვეტილება ჟურნალისტებს დეკანოზმა, დავით შარაშენიძემ გააცნო. 42-მდე შემცირდა ეპარქიების რაოდენობა, ხოლო მღვდელმთავრების რაოდენობა 44-მდე იზრდება. წმინდა სინოდი ქვეყანაში რელიგიურ ნიადაგზე წარმოშობილ კონფლიქტებსაც ეხმაურება. საპატრიარქო მთავრობას საკანონმდებლო ბაზის მოწესრიგებას სთხოვს, ხოლო მორწმუნეებს თავშეკავებისკენ მოუწოდებს. სინოდის შეფასებით რელიგიურ ნიადაგზე დაპირისპირება ხელოვნურად არის პროვოცირებული.

„არაერთხელ ჰქონდა ადგილი მუსლიმებსა და ქრისტიანებს შორის სიტუაციის დაძაბვის მცდელობას, რაც ხელოვნურად შექმნილი პრობლემაა. ეს მიზნად ისახავს, ორი ტრადიციული რელიგიის და მათი წარმომადგენლების დაპირისპირებას. წმინდა სინოდმა დაადგინა - ეთხოვოს ხელისუფლებას დროულად გამოიძიონ განვითარებული მოვლენები და მიიღონ სათანადო ზომები, სამართლებრივი ბაზის შესადგენად" - აღნიშნავს, დეკანოზი დავით შარაშენიძე.