20:00 საათზე, კინოთეატრ „რუსთაველში" კავკასიაში დოკუმენტური ფილმების პირველი საერთაშორისო ფესტივალი იხსნება.

Cin-DOC-თბილისი ქართველ კინომოყვარულებს მაღალმხატვრულ დოკუმენტურ ფილმებს სთავაზობს მთელი მსოფლიოდან: ჩილე, ესპანეთი, იამაიკა, გერმანია, საფრანგეთი, პოლონეთი, რუსეთი, მაროკო, ლიტვა.

კინოსეანსების პარალელურად, ფესტივალის პროგრამა მოიცავს მასტერკლასებს, უორქშოფის სესიებს (Docstories Georgia), კონფერენციებსა და საბავშვო სექციას - Cin-DOC Young.

Cin-DOC თბილისი 5 სექციისგან შედგება: International Competition - საერთაშორისო კონკურსი; Focus-Caucasus, სადაც წარმოდგენილია კავკასიური შემოქმედებითი დოკუმენტური ფილმები. სექციის ფარგლებში გაიმართება კონფერენცია, რომელიც ხელს შეუწყობს სამხრეთ კავკასიის რეგიონში დოკუმენტური კინოპროფესიონალების კოლაბორაციას; Cin-DOC Young - სექციის ძირითადი აუდიტორია მოზარდი მაყურებელია, რომელიც აქტიურად ჩაერთვება კინოსეანსის შემდგომ დისკუსიაში; ქართული პანორამა - დაეთმობა ქართულ დოკუმენტურ კინოს, რაც საშუალებას მისცემს უცხოელ სტუმრებს გაეცნონ ეროვნულ კინოპროდუქციას. ამასთანავე, ქართული პანორამის ფარგლებში, პირველად მოხდება ეროვნული დოკუმენტური კინოფილმების თავმოყრა; Docstories Georgia - წარმოადგენს ვორქშოფს, რომელშიც მონაწილეობას ქართველი რეჟისორები და პროდიუსერები მიიღებენ. ისინი იმუშავებენ საერთაშორისო ტუტორებთან ერთად და საბოლოოდ წარადგენენ საკუთარ კინოპროექტებს Pitching Forum-ზე, რომელიც გაიმართება ფესტივალის დასკვნით ნაწილში.

მასტერკლასებსა და კონფერენციებს გაუძღვებიან სხვადასხვა საერთაშორისო ფესტივალის მონაწილე ორგანიზაციის წარმომადგენლები. Cin-DOC-თბილისი დაეხმარება რეჟისორებს, დამოუკიდებელ პროდიუსერებსა და კინომოღვაწეებს პროფესიულ განვითარებაში. ფესტივალი ცდება ტრადიციულ ფორმატს. საზოგადოების აქტიურ წევრებს, სოციალურ მუშაკებს, კინომოყვარულებს და ბავშვებს შესაძლებლობა ექნებათ კინოექსპერტებთან ერთად ისაუბრონ აქტუალურ თემებზე და საფესტივალო გარემოთი მიიღონ სიამოვნება.

ფესტივალი ხორციელდება Movies That Matter / Amnesty International, IDFA Berta Fund (International Documentary Film Festival - Amsterdam), Black Sea Trust for Regional Cooperation, Goethe Institut - თბილისი, Institut Francais, ფონდი - „ღია საზოგადოება საქართველოს", თბილისის მერიისა და საქართველოს კულტურისა და ძეგლთა დაცვის სამინისტროს მხარდაჭერით.

კინოფესტივალის მიზანია 6 დღის განმავლობაში, 15-დან 20 ოქტომბრის ჩათვლით, საფესტივალო გარემო ფართო საზოგადოების თავშეყრის ადგილად აქციოს.