ივანე ჯავახიშვილის სახელობის თბილისის სახელმწიფო უნივერსიტეტის სტუდენტური თვითმმართველობის კულტურის დეპარტამენტის ორგანიზებით, თსუ-ის I კორპუსის სააქტო დარბაზში მურმან ჯინორიას მონოსპექტაკლი „ქარი მწყურია მე პირდაპირი" გაიმართა.
„მესამე წელია მოვდივარ და ისე, როგორც დღეს იყო, დარბაზი გადაჭედილია ხოლმე ახალგაზრდებით. მთავარია, რომ ახალგაზრდებს უნდათ ქართული პოეზია და ეს იმდენად სასიამოვნოა ჩემთვის, როგორც ამ საღამოს მთავარი მოქმედი პირისთვის, რომ ძალა მეძლევა, ჯერ კიდევ საჭირო ვარ - ეს დიდი სტიმულია. როდესაც დარბაზიდან მოდის ასეთი ძალა, თავს ვალდებულად თვლი, რომ უფრო მეტი გასცე",- განაცხადა მსახიობმა „რეპორტიორთან" საუბარში.
სპექტაკლი „ქარი მწყურია მე პირდაპირი" ოთხი პირობითი ნაწილისგან - წელიწადის დროთაგან შედგება და ყველა მათგანში შესულია ქართული ლიტერატურის საუკეთესო ნიმუშები. ყოველი სეზონი ასოცირდება სხვადასხვა ხასიათისა და სტილის ავტორების შემოქმედებასთან. გაზაფხული - ტერენტი გრანელთან, ზაფხული - გურამ რჩეულიშვილთან, შემოდგომა მისთვის ჩვეული სიჭრელით აერთიანებს ტატო ბარათაშვილის, ილია ჭავჭავაძის, ტიციან ტაბიძის, ლადო ასათიანის, მუხრან მაჭავარიანის, მურმან ლებანიძის, შოთა ნიშნიანიძის, მორის ფოცხიშვილისა და ჯანსუღ ჩარკვიანის შემოქმედებას. ზამთარი კი მსახიობისთვის გალაკტიონ ტაბიძესთან ასოცირდება.
