ერთი თვის წინ რამდენიმე ქართველმა უკრაინაში რუსეთის წინააღმდეგ ბრძოლის სურვილი გამოხატა. ისინი უკრაინაში მებრძოლ ქართული ლეგიონის მეთაურს, მამუკა მამულაშვილს დაუკავშირდნენ და ვერის პარკში შეხვდნენ. ქართული ლეგიონის მეთაურმა განაცხადა, რომ შეხვედრის მიზანი უკრაინაში წასვლით დაინტერესებული ადამიანების გაფრთხილება იყო, რომ მათ დამოუკიდებლად არ გადაწყვიტონ საბრძოლველად წასვლა.
გასარკვევად, ჩავიდნენ თუ არა ქართველები უკრაინაში, „რეპორტიორი" მამუკა მამულაშვილს დაუკავშირდა, რომელმაც განმარტა, რომ ამ ეტაპზე საქართველოდან მებრძოლების დამატება აუცილებლობას არ წარმოადგენს, პირიქით, ასეთ შემთხვევაში უფრო მეტი რისკი იქნება, რომ ბრძოლას ქართველი შეეწიროს.
-რამდენმა გამოხატა უკრაინის გვერდში დგომის სურვილი და თუ ჩამოვიდა რომელიმე უკრაინამდე?
- ბევრი ჩამოვიდოდა რომ მიმეშვა, მაგრამ განზრახ არ ჩამყავს, არ მინდა ქართველებში მსხვერპლი იყოს. ჯერ საკმარისი ვართ, რაც ბევრი ვიქნებით, მით უფრო დიდი ალბათობაა, რომ ვინმე დაიღუპოს.
-ვინ უზრუნველყოფს ქართველების ჩაყვანა-დაბინავება-პატრონობას?
- მე ჯერ არავინ ჩამყავს და რა უზრუნველყოფაზეა საუბარი. არიან სხვა ჯგუფებიც, რომლებთანაც მე დისტანცია მაქვს და ისინი რას საქმიანობენ, არ ვიცი. გიგი კალანდაძეც რამდენიმე კაციან გუნდს ხელმძღვანელობს.
-ცალკე რატომ არიან ერთი იდეოლოგია ხომ გაქვთ? რუსეთის წინააღმდეგ ბრძოლა?
-კი, იდეოლოგია ერთია, მაგრამ სხვა გუნდია და ჩემთან არ ასოცირდებიან. ჩემს გუნდს რაც შეეხება, ვცდილობ ნაკლები ხალხი ჩამოვიდეს საქართველოდან უკრაინაში.
შეგახსენებთ, 7 მარტს, უკრაინაში ქართული ლეგიონის მეთაური მამუკა მამულაშვილი ვერის პარკში ახალგაზრდებს შეხვდა. შეხვედრის მიზანი იმ ადამიანების გაცნობა იყო, ვისაც უკრაინაში რუსეთის წინააღმდეგ საომრად წასვლა სურს.
