საქართველოს ტერიტორიაზე საგზაო მოძრაობასთან დაკავშირებული საკითხები სრულიად ახალი - ერთიანი კანონის ფარგლებში ექცევა. "საგზაო მოძრაობის შესახებ" კანონი - ასე ეწოდება შინაგან საქმეთა სამინისტროს მიერ მომზადებულ პროექტს, რომელიც განსაზღვრავს საგზაო მოძრაობის ორგანიზების და უსაფრთხოების უზრუნველყოფის სამართლებრივ საფუძვლებს, საგზაო მოძრაობის უსაფრთხოების სფეროში სახელმწიფო პოლიტიკის ძირითად მიმართულებებს, ხელისუფლების ორგანოების უფლებამოსილებებს, საგზაო მოძრაობის წესებსა და პირობებს, ასევე საგზაო ნიშნებსა და საგზაო მონიშვნებს, მოძრაობის მონაწილეთა უფლება- მოვალეობებს, სატრანსპორტო საშუალებათა მართვის უფლების მინიჭებისა და სატრანსპორტო საშუალებათა რეგისტრაციის ზოგად მოთხოვნებს. "საგზაო მოძრაობის შესახებ" კანონის მოქმედება გავრცელდება უცხო ქვეყნის მოქალაქეებზეც და მოქალაქეობის არ მქონე პირებზე, ასევე საქართველოს ტერიტორიაზე საერთაშორისო მოძრაობაში მყოფ სატრანსპორტო საშუალებებზე. შესაბამის საკანონმდებლო პაკეტს დღეს, პირველი მოსმენით, ადამიანის უფლეთა დაცვის კომიტეტი განიხილავს.
