ცენტრალურ საარჩევნო კომისიაში საინფორმაციო ბრიფინგი გაიმართა, სადაც ცესკოს სპიკერმა, ეკატერინე აზარაშვილმა,  27 ოქტომბრის პრეზიდენტის არჩევნებისთვის ამომრჩეველთა საერთო რაოდენობაზე ისაუბრა. ამომრჩეველთა რაოდენობა 3, 537, 719-ს შეადგენს.

"მათი რაოდენობა შეადგენდა 98, 000-ს. ამ რაოდენობიდან საარჩევნო მიზნებისთვის მოხდა მათი ფილტრაცია, რის საფუძველზეც საარჩევნო ადმინისტრაციამ შესაბამის უბნებში გამოაკრა 74, 896 რეგისტრაციიდან მოხსნილი მოქალაქის სია და მათ შესაძლებლობა მისცა გადაემოწმებინათ საკუთარი სტატუსი. სახელმწიფო სერვისების განვითარების სააგენტოს მონაცემების მიხედვით რეგისტრაციიდან მოხსნილი ამომრჩევლებიდან 10 ოქტომბრის ჩათვლით ხელახალი რეგისტრაცია გაიარა 9, 142 მოქალაქემ. შესაბამისად, ისინი მიიღებენ მონაწილეობას საპრეზიდენტო არჩევნებში. ვინც კანონით დადგენილ ვადაში ვერ შეძლო რეგისტრაციის გავლა, ისინი ვერ მოხვდნენ ამომრჩეველთა სიაში. ამომრჩეველთა სიაში ასევე ვერ მოხვდა საზღვარგარეთ მყოფი 3, 979 საქართველოს მოქალაქე, რომელთა რეგისტრაციაც გაუქმებულია სახელმწიფო სერვისების განვითარების სააგენტოს მიერ.ცესკო, იუსტიციისა და საგარეო საქმეთა სამინისტროებთან ერთად ახორციელებს საზღვარგარეთ მყოფი რეგისტრაციიდან მოხსნილი მოქალაქეების  ინფორმირებას." -განაცხადა აზარაშვილმა.