„რადიო თავისუფლება // თავისუფალი ევროპის" ქართული სამსახურის კორესპონდენტმა მარიამ ჭიაურელმა ინტერვიუ ჩამოართვა ევროპის სახალხო პარტიის წევრს, რუმინელ ევროპარლამენტარს ტრაიან უნგურიანუს, რომელიც ევროკავშირ-საქართველოს საპარლამენტო თანამშრომლობის კომიტეტის წევრია.

გთავაზობთ შემოკლებით:

 „თავისუფლება": ამ ერთი კვირის წინ ევროკავშირმა ოფიციალურად გამოაცხადა, რომ რიგის სამიტზე საქართველო, ისევე როგორც უკრაინა, არ მიიღებს თანხმობას ევროკავშირთან უვიზო მიმოსვლაზე. რა წვლილი მიგიძღვით თქვენ და, ზოგადად, ევროპარლამენტს ასეთი გადაწყვეტილების მიღებაში?

ტრაიან უნგურიანუ: როგორც ევროპის პარლამენტის წევრს, როგორც წევრს, რომელსაც დიდი ხანია, კავშირი აქვს საქართველოსთან, ქართველ პოლიტიკოსებთან, როგორც აღმოსავლელ პარტნიორთა და ევროკავშირის საპარლამენტო ასამბლეის წევრს - ბევრჯერ მიმუშავია საქართველოს თემაზე. ვფიქრობ, რომ ევროპარლამენტის სწორედ აღმოსავლეთევროპელმა წევრებმა განსაკუთრებით აქტიურად ვიმუშავეთ ისეთი ქვეყნების სწორად, ისეთი ქვეყნების უკეთესად გასაგებად, როგორიც არის საქართველო და უფრო სწრაფად და ნაყოფიერად სამოქმედოდ ისეთ ქვეყნებთან მიმართებით, როგორიც არის საქართველო - იმ მიზნით, რომ იყოს მჭიდრო თანამშრომლობა და, ერთ მშვენიერ დღეს, ევროკავშირში გაწევრიანებაც. ვიზების საკითხს რაც შეეხება - ვიცი, ის ყველგან მტკივნეულია - აღმოსავლეთის პარტნიორობის ყველა წევრ ქვეყანაში. ეს საკითხი არ არის დამოკიდებული ევროპარლამენტზე. ეს არის გადაწყვეტილება, რომელიც მოდის ევროკომისიისაგან და არ არის საკითხი, რომელსაც პარლამენტი მხარს უჭერს ან უარყოფს. გადაწყვეტილებას თავდაპირველად ევროკომისია იღებს. კი, მას წარუდგენენ პარლამენტს, მაგრამ პარლამენტში კენჭისყრა არ არის გადამწყვეტი. ჩემი აზრით, ვიზების ლიბერალიზაცია არის ყველაზე მცირე, რაც ევროკავშირმა უნდა გააკეთოს საქართველოსნაირ ქვეყნებთან მიმართებით. მან დიდი წარმატება მოიტანა მოლდოვის შემთხვევაში - ასე რომ, გვაქვს პრეცედენტი.

„თავისუფლება": მოლდოვა არის აღმოსავლეთის პარტნიორობის ერთადერთი წევრი, რომელსაც უვიზო მიმოსვლა აქვს ევროკავშირთან

ტრაიან უნგურიანუ: ზუსტად ასეა. უვიზო მიმოსვლა უნდა გაფართოვდეს, რასაკვირველია, რეალისტურად... ნებისმიერმა ქვეყანამ არ უნდა მიიღოს ეს ახალი რეჟიმი. მაგრამ ახალი რეჟიმი ფართო უნდა იყოს და არ იყოს გამონაკლისი მხოლოდ მოლდოვასთვის. საქართველოს, სომხეთს, უკრაინას აქვთ თავ-თავიანთი არგუმენტები, მიზეზები, რატომ სთხოვენ ევროპას ასეთ ნაბიჯს, ასეთ ჟესტს. არა მგონია, რიგამ რამე გადაჭრას ან რამე შეცვალოს, მაგრამ ვფიქრობ, რომ მთელ რეგიონში ვითარების გათვალისწინებით, უნდა დაჩქარდეს ევროპაში მიმდინარე ყველა პროცესი, ევროპის ყველა მექანიზმის მუშაობა, ყველა ნაბიჯი ევროპასთან დასაახლოებლად.

„თავისუფლება": ამას ამბობთ უკრაინაში ომის ფონის გამო?

ტრაიან უნგურიანუ: დიახ, რასაკვირველია! არაფერი ხდება იმაზე უფრო მნიშვნელოვანი, ვიდრე ომი უკრაინაში. ეს არ არის ადგილობრივი პრობლემა - ეს არის ევროპის პრობლემა და საჭიროა ამის სათანადო გაცნობიერება. (ევროკავშირში) ხალხის ყურადღება ახლა ძირითადად მიმართულია სამხრეთისაკენ, ხმელთაშუა ზღვაში კრიზისისაკენ. მაგრამ ეს არ უნდა გახდეს საბაბი იმისათვის, რომ ნაკლები ყურადღების მიაქციო ან იგნორირება გაუკეთო იმას, რაც ხდება ევროკავშირის აღმოსავლეთ ფლანგზე, უკრაინაში. რადგან თუ აღმოსავლეთსა და აღმოსავლეთ პარტნიორებს დავკარგავთ, მთელ ევროპას შეექმნება უზარმაზარი პრობლემა და ძალიან, ძალიან ძნელი იქნება მისი მოგვარება.

„თავისუფლება": თქვენ ამბობთ, რომ უვიზო მიმოსვლა არის ყველაზე მცირე, რაც უნდა გაკეთდეს...

ტრაიან უნგურიანუ: დიახ, ყველაზე მცირე, რადგან, პირველ რიგში, ის ეხება ყოველდღიურ ცხოვრებას და რიგით ადამიანებს.

„თავისუფლება": და ვფიქრობ, ევროკავშირში ინტეგრაციისადმი მხარდაჭერას ქვეყნებში, როგორიც საქართველოა.

ტრაიან უნგურიანუ: კი, რასაკვირველია! ეს ძალიან შეუწყობს ხელს ევროკავშირში ინტეგრაციის უკეთ გაგებას ყველა, ნებისმიერ ქვეყანაში - აღმოსავლეთის პარტნიორობის წევრთა შორის. ეს არის ის, რისი გაკეთებაც შესაძლებელია და უნდა გაკეთდეს კიდეც.

„თავისუფლება": შეგიძლიათ გვითხრათ, რა არის მიზეზი იმისა, რომ ევროკავშირი ამას არ აკეთებს. რა არის მთავარი პრობლემა? შიში, რომ ბევრი ქართველი ჩავა ევროკავშირის ქვეყნებში?

ტრაიან უნგურიანუ: ერთი შეხედვით ასეა, ეს შეიძლება გონივრული ეჭვი იყოს. დარწმუნებული არა ვარ, რომ მართლაც ასეა. მე ეჭვი მაქვს, რომ სინამდვილეში ევროკავშირის ჩვეულ განმარტებებს უკან დგას რუსეთის განაწყენების შიში. აქამდეც, სამწუხაროდ, ბევრჯერ მომხდარა,რომ ევროპის მთავრობები და ევროპული სტრუქტურები მუშაობენ პირობით - არ გაანაწყენონ რუსეთი. ჩემი აზრით, ამით აიხსნება, რატომ არის რომ რიგის სამიტისათვის ჯერაც არა გვაქვს სათანადო დამოკიდებულება ევროკავშირის მხრიდან. ვგულისხმობ იმას, რომ ევროპის კავშირი ჯერ კიდევ არ არის მზად, ამ ქვეყნებს შესათავაზოს ე.წ. „ევროპული პერსპექტივა", რაც ნიშნავს მათთვის ევროკავშირში გაწევრიანების ზოგადი გეგმის შეთავაზებას. აქამდე რაც ხდება - ფორმულა, რომლის მიხედვითაც არსებობს მომავალი და ა.შ. უკვე აღარ არის საკმარისი. ეს საკმარისი იყო, ვთქვათ, პირველი 10-15 წელი. მაგრამ ვითარება შეიცვალა და, ჩემი აზრით, მთავარი ახლა ეს არის: ამ ქვეყნებისათვის მტკიცე ევროპული პერსპექტივის შეთავაზება.

„თავისუფლება": ისევ უკრაინაში შექმნილი ვითარების გამო...

ტრაიან უნგურიანუ: დიახ. ჩემი აზრით, ეს ევროკავშირის ინტერესებშია და ევროპას ყველაზე უკეთ უნდა ესმოდეს, რომ მისივე ინტერესებშია ამ ქვეყნებისთვის ევროპული პერსპექტივის შეთავაზება.

„თავისუფლება": თქვენ იცით, რომ ევროკავშირში საქართველოს ინტეგრაციის პროცესი განსაზღვრულია ასოცირების შეთანხმებით და შეთანხმებით ღრმა და ყოვლისმომცველი თავისუფალი სავაჭრო სივრცის შესახებ. მაგრამ ფიქრობთ, რომ ეს საკმარისი არ არის, რომ საქართველოს სჭირდება ევროკავშირში გაწევრიანების მკაფიო პერსპექტივა?

ტრაიან უნგურიანუ: დიახ, ვაჭრობის შესახებ შეთანხმებები ძალაინ კარგია. მაგრამ... მათი განხორციელება იოლი არ არის. მეორე - თუ ვაჭრობაზე ვსაუბრობთ, ზოგადად ეკონომიკაზე, რუსეთისთვის გაცილებით უფრო იოლია, ძლიერი ზეგავლენა იქონიოს ქვეყნებზე, როგორიც საქართველოა, ვიდრე ევროკავშირისათვის - საქართველო გაიყვანოს თავის ეკონომიკურ ორბიტაზე. სავაჭრო შეთანხმება ძალიან კარგია! ყოველთვის კარგია მეგობრებთან ვაჭრობაზე შეთანხმება, მაგრამ ჩვენ ისეთ დროში გვიწევს ცხოვრება, რომელიც სხვა რამეს, რომელიც მეტს მოითხოვს.

„თავისუფლება": თქვენ, როგორც ევროპის სახალხო პარტიის წარმომადგენელმა, დარწმუნებული ვარ, იცით კრიტიკის შესახებ, რომელსაც თქვენი პარტია გამოთქვამს საქართველოს ამჟამინდელი მთავრობის მისამართით - პოლიტიკურად მიკერძოებული, შერჩევითი სამართლის ბრალდებით. რა აზრი გაქვთ ამ საკითხზე?

ტრაიან უნგურიანუ: ვფიქრობ, რომ ჩვენი კრიტიკა სწორი იყო, რომ ჩვენს კრიტიკას მიზეზი ჰქონდა. ის რაც საქართველოს სასამართლო სისტემაში ხდება, ზოგჯერ აბსურდულია, ზოგჯერ ძალიან სერიოზული პრობლემა. ასე რომ, არსებობდა საფუძველი ჩვენი კრიტიკისათვის. მაგრამ ამავე დროს ვამბობ, რომ არსებობს რაღაც, რაც ამ კრიტიკაზე უფრო მაღლა დგას. მტრული, აგრესიული რუსეთის ფაქტორის გათვალისწინებით, ვფიქრობ, რომ ევროპის კავშირმა - ევროპის სახალხო პარტიის ჩათვლით - და საქართველომ უნდა ითანამშრომლონ პოლიტიკური უთანხმოების, ამა თუ იმ სფეროში სხვადასხვა ხედვისა და ფასეულობების მიუხედავად.

„თავისუფლება": მიუხედავად იმისა, რომ - თუ ამბობთ, ცუდია, რაც საქართველოში ხდება პოლიტიკურად მიკერძოებული სასამართლო სისტემის მხრივო - ეს დიდი პრობლემაა დემოკრატიისათვის!

ტრაიან უნგურიანუ: სწორია. მე მსმენია ეს არგუმენტი, მაგრამ არ ვიზიარებ მას. ვფიქრობ, რომ ბევრი ევროპელი პოლიტიკოსი შეცდომას უშვებს, როცა, მაგალითად, უკრაინისაგან მოითხოვს რეფორმების დაჩქარებასა და გაღრმავებას. ჩემი აზრით, ახლა არ არის ასეთი რეკომენდაციების დრო! რასაკვირველია უკრაინას, და საქართველოსაც, სჭირდებათ პროგრესი სასამართლო სისტემაში, კანონის უზენაესობის მხრივ, ეკონომიკური რეფორმების კუთხით. მაგრამ ეს ერთია - და სხვა საქმეა უკრაინასა და საქართველოში სტრატეგიულ ვითარებასთან დაკავშირებული გადაუდებელი აუცილებლობა. ამ ქვეყნებს ვერ ვეტყვით: იცით, ჩაატარეთ სასამართლო სისტემის რეფორმა და მერე ვნახოთ, რა მოვიმოქმედოთ რუსეთის საკითხში. ეს აშკარა აბსურდია! ჩემი აზრით, ახლა პრიორიტეტი უნდა იყოს სტრატეგიული ზომები და თანამშრომლობა. დრო საკმარისი იქნება სასამართლო სისტემაზე სამუშაოდ - კრიზისიდან გამოსვლის შემდეგ. და არა ახლა!

http://www.radiotavisupleba.ge/content/traian-ungureanu-interview/27018806.html

«Радио Голос Ирана»: რა კავშირი აქვს ქართულ-ამერიკული სამხედრო წვრთნებს „ისლამურ სახელმწიფოსთან"?

ირანის სახელმწიფო რადიოსადგურ „ირანის ხმის" ეთერში 15 მაისს გადაიცა ინტერვიუ რუს პოლიტოლოგთან, ჟურნალ „გეოპოლიტიკის" მთავარ რედაქტორ ლეონიდ სლავინთან. ინტერვიუს მთავარი თემა - საქართველოში, ვაზიანის აეროდრომზე დაწყებული ქართველ და ამერიკელ სამხედრო მოსამსახურეთა ერთობლივი სამხედრო წვრთნები.

ლეონიდ სავინის თქმით, ქართულ-ამერიკულ ერთობლივ სამხედრო სწავლებას რამდენიმე განზომილება აქვს:

 „პირველი - ესაა მანევრების სტრატეგიული მნიშვნელობა, რომელიც სავსებით თავსდება აშშ-ისა და მისი NATO-ელი მოკავშირეების მიერ აღმოსავლეთის ევროპაში წარმოებული ოპერაციის „Atlantic Resolve"-ს ჩარჩოებში, რომელშიც ბალტიისპირეთის ქვეყნები, ბულგარეთი და რუმინეთი მონაწილეობენ, ახლა მათ საქართველოც შეუერთდა. ამ ოპერაციის მიზანია ერთგვარი სამხედრო „ღერძისა" თუ „სანიტარული კორდონის" შექმნა რუსეთთან მიმართებით. შესაბამისად, რა თქმა უნდა, აღნიშნული წვრთვნები რუსეთის წინააღმდეგაა მიმართული. აბა, მაშ რა უნდა და რატომ ატარებს სამხედრო მანევრებს ამერიკის შეერთებული შტატები სამხრეთ კავკასიაში, უშუალოდ რუსეთის საზღვრებთან ახლოს?

მეორე განზომილება ფსიქოლოგიურ-აგენტურული სახითაა გამოხატული: ვაშინგტონს სურს, გააღრმაოს ურთიერთობა საქართველოსთან, უფრო მეტი ცნობები და ინფორმაცია შეკრიბოს თავისი აგენტურის მეშვეობით, განსაკუთრებით ეს ეხება პანკისის ხეობაში შექმნილ ვითარებას. გარდა ამისა, აშშ-ის სპეცსამსახურები დაინტერესებულნი არიან აგრეთვე ჩრდილოეთ კავკასიაში არსებული სიტუაციითაც. ამ მხრივ მნიშვნელოვანია  „ერაყისა და ლევანტის ისლამური სახელმწიფოს" ფაქტორი. რუსეთის სპეცსამსახურები და კოლექტიური უშიშროების ხელშეკრულების ორგანიზაციის მონაწილე სახელმწიფოები არ გამორიცხავენ იმის შესაძლებლობას, რომ „ელის"-ის ბოევიკები შესაძლოა გადასროლილნი იქნენ როგორც ცენტრალურ აზიაში, ასევე ჩრდილოეთ კავკასიაში და სამხრეთ კავკასიაში სხვადასხვა პროვოკაციების მოსაწყობად. რადგანაც „ელის"-ის რიგებში უკვე არიან საქართველოს მოქალაქეები, ასეთი ვარიანტის განხორციელება სრულიად შესაძლებელია და, ალბათ, ამერიკელებიც უკვე მუშაობენ ამ მიზნით რაღაც დერეფნების შექმნაზე, რათა ახლო აღმოსავლეთში - სირიასა და ერაყში „ელის"-ის წინააღმდეგ მოქმედი თავიანთი აგენტები კავკასიაში გადმოიყვანონ.

რასაკვირველია, რუსეთის სპეცსამსახურებიც ყურადღებით აკვირდებიან ახლო აღმოსავლეთის სიტუაციას, აწარმოებენ მონიტორინგს და ბუნებრივია, ამაში საქართველოში გამართულ ერთობლივი მანევრების მონიტორინგიც შედის. მე ვფიქრობ, რომ მიღებული იქნება განსაზღვრული პრევენტიული ზომები: რუსეთი არ დაელოდება იმას, სანამ „ბოევიკები" ჩვენს სახლებში მოვლენ. ჩვენ გვაქვს კარგი გამოცდილება ამ თვალსაზრისით, მაგალითად, დაღესტანში, სადაც „ბოევიკთა" ყოველგვარ გამოხდომას ხელისუფლებისაგან უმკაცრესი რეაგირება მოჰყვება ხოლმე".

          შენიშვნა: აუდიოჩანაწერი ციტირებულია შემოკლებით.

http://russian.irib.ir/analitika/interview/item/251750

(მოამზადა სიმონ კილაძემ, „რეპორტიორის" ანალიტიკური სამსახურის ხელმძღვანელმა)