ლიუბლიანაში დაიწყო ახალგაზრდა ძიუდოისტთა მსოფლიოს ჩემპიონატი. 23 ოქტომბერს საქმეში მსუბუქი წონის მოჭიდავეები ჩაერთვნენ. 60 კგ-ში საქართველოს მონაწილე არ ჰყავდა. 55 კგ-ში ლერი ჭელიძე ჯერ მონღოლ ბარსურენს ვაზარით გასცდა, მერე ავსტრიელი მარკ ტობინი და უზბეკი სობიტ ხუჯამოვი დააიპონა, მაგრამ მეოთხედფინალში ბრაზილიელ ტორენტესთან აშკარად გადაღლილი ჩანდა: პირველი ორი წუთი თანაბარ ბრძოლაში გაილია, მეტოქეებმა თითო იუკო მიითვალეს, მაგრამ ბოლოსკენ ბრაზილიელმა გაილაღა და სამივე სინჯის გდება გააკეთა. რეპეშაჟში გადართულმა ჭელიძემ ევროპის მოქმედი ჩემპიონი დავუდ მამადოვი პირველივე წუთზე შებოჭა, ბრინჯაოს ფინალში კი იაპონელ რიუჯუ ნაგაიამას ვაზარით აჯობა, თუმცა შეხვედრის მიწურულს ისე დაიღალა, პასიურობისთვის კინაღამ მოხსნეს.
ამგვარად, ქართველთა ყულაბაში პირველი ბრინჯაო ლერი ჭელიძემ ჩააგდო. დღეს 66 და 73 კილოგრამ წონით კატეგორიებში საქართველოს სახელით გელა კელიხაშვილი, ლევან გუგავა და ფრიდონ გიგანი ჭიდაობდნენ. სამწუხაროდ, სამივე მათგანი პირველსავე შეხვედრაში დამარცხდა და მედლებისთვის ბრძოლას გამოეთიშა.
