გურამ შარაძის მკვლელობიდან 8 წლისთავზე, მელიქიშვილის გამზირზე, მისი მკვლელობის ადგილზე საპროტესტო აქცია გაიმართა. პროტესტი მიმართული იყო „ნაციონალური მოძრაობის", მისი მხარდამჭერი საერთაშორისო ორგანიზაციებისა და მოქმედი ხელისუფლების წინააღმდეგ.
როგორც აქციის ორგანიზატორმა, გურამ შარაძის შვილმა რუსუდან შარაძემ განაცხადა, უამრავი გახმაურებული საქმეა დღემდე გამოუძიებელი და აუცილებელია სამართლიანობის აღდგენა. შარაძე იმედს არ კარგავს, რომ მამამისის მკვლელი აუცილებლად დაისჯება.
აქციას ესწრებოდნენ გურამ შარაძის ნათესავები, მეგობრები და მისი მომხრეები.
2007 წლის 20 მაისს ყოფილი პარლამენტარი, აკადემიკოსი გურამ შარაძე თბილისში, მელიქიშვილის გამზირზე მოკლეს. ცეცხლსასროლი იარაღიდან 3-ჯერ ნასროლი ტყვიით მიყენებული ჭრილობების შედეგად შარაძე ადგილზე გარდაიცვალა.
