ხვალ, 26 მაისს, მიხეილ მესხის სახელობის სტადიონი დავით ყიფიანის სახელობის თასის ფინალურ დაპირისპირებას უმასპინძლებს, სადაც ერთმანეთს თბილისის „დინამო" და „სამტრედია" შეერკინებიან.
შეგახსენებთ, რომ უმაღლესი ლიგის სეზონი დასრულდა და ჩემპიონობა გორის „დილამ" მოიპოვა, მეორე ადგილი ბათუმის „დინამოს" ხვდა წილად, ხოლო თბილისის „დინამო" მესამე ადგილს დასჯერდა, რაც იმას ნიშნავს, რომ კლუბი ევროპა ლიგის შესარჩევზე გარანტინებულად იასპარეზებს.
მიუხედავად იმისა, რომ უმაღლესი ლიგის წლევანდელმა დებიუტანტმა „სამტრედიამ" სეზონი კარგად დაიწყო, გადამწყვეტ ფაზაში გუნდმა მოიკოჭლა და 30 ტურის შემდეგ, სატურნირო ცხრილის მეექვსე პოზიციას დასჯერდა, რაც იმას ნიშნავს, რომ სამტრედიელებს ევროსარბიელზე ასპარეზობის შანსები მხოლოდ დავით ყიფიანის თასის გათამაშებიდან შერჩენიათ.
თავის მხრივ, ქართული ფეხბურთის ფლაგმანმა მიმდინარე სეზონში უმაღლესი ლიგის ჩემპიონობა დათმო და მხოლოდ ისღა დარჩენია, რომ მეორე ტიტულისთვის იბრძოლოს. გარდა ამისა, კლუბი ახალმა მთავარმა მწვრთნელმა, გია გეგუჩაძემ ჩაიბარა და მისი თაოსნობით „დინამოში" დღეს არსებული კოლექტივი მეორე მატჩს ჩაატარებს, თანაც ასეთ მნიშვნელოვანს.
ერთი სიტყვით, მიხეილ მესხის სახელობის სტადიონი შეუპოვარი დაპირისპირების მოლოდინშია. შეხვედრა თბილისის დროით 19:00 საათზე აიღებს სტარტს.
