ოლიმპიური თამაშების მთავარი სიმბოლო საქართველოშია.  გამოშვებას ვიწყებთ ბათუმით, სადაც ეს წუთია, ანთებული ჩირაღდანი საბერძნეთითან ჩამოიტანეს. აეროპორტის ტერიტორიაზე ოლიმპიური ცეცხლის დახვედრის საზეიმო ცერემონია იწყება, რომელშიც ათეულობით მეჩირაღდნე მიიღებს მონაწილეობას. ევროპის ახალგაზრდული ზაფხულის ოლიმპიური ფესტივალის, თბილისი 2015-ის სიმბოლოს ათენიდან ქართული დელეგაცია ჩამოჰყვა, რომელიც საბერძნეთის დედაქალაქში ცეცხლის ანთების ცერემონიას დაესწრო. საქართველოში ჩამოტანილ ჩირაღდანს მხატვრულ ტანვარჯიშში მსოფლიო ჩემპიონი რუსუდან სიხარულიძე მიიღებს. ბათუმის აეროპორტის შემდეგ სანახაობა უკვე პიაცაზე გაგრძელდება, სადაც ცეცხლს ვეტერანი ფეხბურთელი რევაზ ჩელებაძე შეიტანს. ქართველი მომღერლების მონაწილეობით კონცერტი დაიწყება. ევროპის ახალგაზრდულ ოლიმპიურ თამაშებში, რომელსაც საქართველო პირველად უმასპინძლებს, 49 ქვეყნის 4 000-მდე სპორტსმენი მიიღებს მონაწილეობას. ერთ-ერთი ყველაზე მნიშვნელოვანი სპორტული მოვლენის მასპინძლობის უფლება ჩვენმა ქვეყანამ 5 წლის წინ, 2010 წლის 27 ნოემბერს ბელგრადში ევროპის ოლიმპიური კომიტეტების ასამბლეაზე ხმათა უმრავლესობით მოიპოვა.

ახალგაზრდული ფესტივალი თბილისში 26 ივლისს იწყება. მანამდე, ათენიდან ჩამოტანილი ოლიმპიური ცეცხლი მთელ საქართველოს მოივლის. 14 ივლისს კი ჩირაღდანს დედაქალაქში შემოიტანენ. შესაბამისად ესტაფეტა უკვე თბილისის სხვადასხვა უბანში გაგრძელდება.

(მოამზადა თეონა რამაზაშვილმა)