,,გაყიდვების მართვის კომპანია'' ქართულ კომპანიებს მოსკოვში დაგეგმილ საერთაშორისო გამოფენაში World Food 2013-ში მონაწილეობას სთავაზობს. გამოფენა მოსკოვის ,,ექსპოცენტრში'' 16-19 სექტემბერს გაიმართება. World Food 2013-ის ორგანიზატორია საერთაშორისო კომპანია ITE, რომელიც ევროპის და აზიის ქვეყნებში სხვადასხვა თემატური გამოფენის ორგანიზებით არის დაკავებული.

World Food 2012-ზე მონაწილეობდა 1600-ზე მეტი კომპანია 69 ქვეყნიდან.,,გაყიდვების მართვის კომპანია'', რომლის მიერ არის შექმნილი ნიშანი ,,აირჩიე ქართული!'' არის ITE-ის პარტნიორი საქართველოში. პარტნიორობის ფარგლებში კომპანიას შესაძლებლობა აქვს გამოფენაზე მინიმუმ 106 კვ.მ ფართობზე მოაწყოს საქართველოს რეგიონალური სექცია, სადაც წარმოდგენილი იქნება ქართული კომპანიები.

„ჩვენ ვთვლით, რომ გამოფენაში მონაწილეობა ხელს შეუწყობს ქართული პროდუქციის საერთაშორისო გაყიდვებს და აქტიურ შესვლას რუსეთის ბაზარზე," - აცხადებენ კომპანიაში.

ღონისძიების მხარდამჭერია საქართველოს სოფლის მეურნეობის სამინისტრო;

გამოფენის ფარგლებში ჩატარდება სხვადასხვა დაჯილდოებები და კონკურსები,  რომელშიც მონაწილეობის მსურველ კომპანიებს საშუალება აქვთ დარეგისტრირდნენ და ჩაერთონ სხვადასხვა ტიპის თემატურ კონკურსებში.