დღეს, 29 მაისს, 19-წლამდელთა ევროპის ჩემპიონატის ელიტრაუნდის I ჯგუფის მატჩში, რომელსაც თბილისი მასპინძლობს, საქართველოს ნაკრები ესპანეთს დაუპირისპირდება.

შეხვედრა თბილისის დროით, 17:00 საათზე, მიხეილ მესხის სახელობის სტადიონზე დაიწყება. ჯგუფის პარალელური შეხვედრა 14:00 საათზე, პორტუგალიასა და თურქეთს შორის გაიმართა. პორტუგალიელებმა მეტოქე გამანადგურებელი ანგარიშით - 6:1 დაამარცხეს და ამ დროისათვის, ჯგუფს ლიდერობენ.

ევროპის ჩემპიონატზე მონაწილეობის უფლება უკვე მოიპოვეს მასპინძელმა საბერძნეთმა, გერმანიამ, რუსეთმა, ჰოლანდიამ, ავსტრიამ, საფრანგეთმა და უკრაინამ.

გიორგი დევდარიანის შეგირდების ესპანელ თანატოლებთან დაპირისპირების პირდაპირ ტრანსლაციას საქართველოს საზოგადოებრივი მაუწყებლის I არხი გადმოსცემს.