შვეიცარიაში მიმდინარე ფიფას საპრეზიდენტო არჩევნებში მოქმედმა პრეზიდენტმა ზეპ ბლატერმა 133 ხმა დააგროვა, მისმა კონკურენტმა იორდანიის პრინცმა ალი ბინ ჰუსეინმა კი მხოლოდ 73. 3 ბიულეტენი გაბათილდა.

პირველ ტურში გამარჯვებისთვის კანდიდატს 140 ხმის მიღება ესაჭიროებოდა, სწორედ ამიტომ მეორე ტური დაინიშნა.

იორდანიის პრინცმა მეორე ტურში მონაწილეობაზე უარი განაცხადა და კანდიდატურა მოხსნა. შესაბამისად, დღეიდან ზეპ ბლატერის ახალი, ოთხწლიანი მმართველობის ციკლის ათვლა დაიწყო.

არჩევნების დასრულების შემდეგ ბლატერმა მომავალი წლის ფიფას კონგრესის მასპინძელ ქალაქად მეხიკო დაასახელა. ფიფას 67-ე კონგრესი კი 2017 წელს ქალაქ კუალა ლუმპურში ჩატარდება, სადაც 2026 წლის მუნდიალის მასპინძელ ქვეყანას დაასახელებენ.

ბლატერმა სიტყვით გამოსვლაში ალი ჰუსეინს ღირსეული კონკურენციისთვის მადლობა გადაუხადა. საზოგადოებას კი შემდეგი ფრაზით დაემშვიდობა:  „ისიამოვნეთ ცხოვრებით" .

ამრიგად ფიფას კვლავ ზეპ ბლატერი უხელმძღვანელებს, რომლის სახელიც ბოლო წლებში არაერთ კორუფციულ სკანდალთან არის დაკავშირებული. ბოლო დღეების განმავლობაში 79 წლის შვეიცარიელი მაღალჩინოსანი პოლიტიკოსების და სპორტული ფუნქციონერების უმკაცრესი კრიტიკის ქარცეცხლშია გახვეული. მას გადადგომისკენ მოუწოდეს ევროკავშირის პირველმა პირებმა და უეფას პრეზიდენტმა მიშელ პლატინიმ.

მრავალმხრივი წინააღმდეგობისა და კრიტიკის მიუხედავად, ზეპ ბლატერმა არ მოხსნა საკუთარი კანდიდატურა და მეხუთედ გახდა ფიფას  პრეზიდენტი, მას ეს თანამდებობა უკვე 17 წელია უკავია.

(მოამზადა თეონა რამაზაშვილმა)