ევროპის 2015 წლის ჩემპიონატის ელიტრაუნდის მეორე მატჩში საქართველოს 19-წლამდელთა ნაკრები პორტუგალიის ეროვნულ გუნდს დაუპირისპირდა და დაძაბულ ორთაბრძოლაში - 2:3 დამარცხდა.

მიხეილ მესხის სახელობის სტადიონზე გამართულ I ჯგუფის მეორე შეხვედრაში მაყურებელმა პირველი გოლი ჯერ კიდევ მე-4 წუთზე იხილა. საქართველოს კართან დანიშნული პენალტის ზუსტად რეალიზება პედრო როდრიგესმა მოახერხა.

პირველი ტაიმის უკანასკნელ წუთზე, ზურაბ მალანიამ წონასწორობა აღადგინა. როგორც ჩანს, შესვენებისთვის გამოყოფილი დრო გიორგი დევდარიანმა სწორად გამოიყენა და 49-ე წუთზე, გურამ გოშთელიანის გატანილი გოლით საქართველოს ნაკრები დაწინაურდა - 2:1.

სამწუხაროდ, ჩვენმა ბიჭებმა უპირატესობა ვერ შეინარჩუნეს. 70-ე წუთზე ფლავია სილვამ წონასწორობა აღადგინა, ხოლო 76-ე წუთზე, ოთო გოშაძის კარში გოლი ჟილ დიასმა გაიტანა და ტაბლოზე საბოლოო ანგარიში - 3:2 პორტუგალიელთა სასარგებლოდ დააფიქსირა.

I ჯგუფის მეორე ტურში თურქეთის U19 ნაკრები ესპანეთს დაუპირისპირდა და 0:5 დამარცხდა.

ამ დროისათვის, ჯგუფს ესპანეთი ლიდერობს, ქულათა ამავე რაოდენობით მეორე ადგილზე პორტუგალიის ნაკრებია, მესამე ადგილს საქართველო იკავებს, ხოლო ჯგუფის ფსკერზე თურქები არიან.

შეგახსენებთ, რომ შემდეგ ეტაპზე ჯგუფიდან მხოლოდ პირველადგილოსანი გადის. გიორგი დევდარიანის შეგირდებს ჯგუფიდან გასაღწევად თეორიული შანსებიც აღარ დარჩენიათ. უკანასკნელ მატჩებში მესამეადგილოსნისა და პირველადგილოსნის ვინაობა გაირკვევა.