იტალიის სერია A-ს უკანასკნელი ტურის შეხვედრები 31 მაისს გაიმართა. მილანის „ინტერმა" საკუთარ მოედანზე „ემპოლის" უმასპინძლა და დაძაბულ ორთაბრძოლაში 4:3 იმარჯვა.

აღნიშნულ შეხვედრაში 90 წუთი ითამაშა საქართველოს ეროვნული ნაკრების 25 წლის ფორვარდმა ლევან მჭედლიძემ, რომელმაც დუბლის შესრულება მოახერხა - ჯერ იყო და 59-ე წუთზე ახლო მანძილიდან ზუსტი თავური დარტყმით გამოირჩა, ხოლო 88-ე წუთზე, საკმაოდ ეფექტური დარტყმით აიღო სამირ ჰანდანივიჩის კარი.

მიმდინარე სეზონში ასპარეზობა მჭედლიძემ 4 გოლით დაასრულა. აღსანიშნავია, რომ ეს სერია A-ში პირველი ქართული დუბლია. აქამდე ქართველ ფეხბურთელს იტალიის პირველობაზე ერთ მატჩში ორი გოლი არ გაუტანია.

შეგახსენებთ, რომ იტალიის „მილანის" ღირსებას მრავალი წლის მანძილზე იცავდა კახა კალაძე, რომელსაც ჯამში 13 გოლი აქვს გატანილი, თუმცა დუბლი არ შეუსრულებია.

სერია A-ს მიმდინარე სეზონის გათამაშება ლევან მჭედლიძის „ემპოლიმ" 42 ქულით მე-15 პოზიციაზე დაასრულა, რაც იმის გარანტიას იძლევა, რომ ქართველის გუნდი მომავალ სეზონშიც იტალიის ყველაზე პრესტიჟულ დივიზიონში იასპარეზებს.