6 ივნისს, ჩემპიონთა ლიგის მიმდინარე გათამაშების ფინალურ დაპირისპირებაში კატალონიის „ბარსელონა" ტურინის „იუვენტუსს" დაუპირისპირდება. აღნიშნულ შეხვედრაში „ბებერი ქალბატონის" კარს ლეგენდარული ჯანლუიჯი ბუფონი დაიცავს, რომელიც ასაკის მიუხედავად, კარიერის დასრულებას ჯერ არ აპირებს.

მომავალ გეგმებთან დაკავშირებით ჯიჯიმ კომენტარი გააკეთა. როგორც ჩანს, „იუვენტუსის" ლეგენდა კარიერის დასრულებას „ბებერი ქალბატონის" მაისურით არ აპირებს.

„იუვენტუსში" თავს შესანიშნავად ვგრძნობ. მინდა, აქ კიდევ რამდენიმე სეზონი ვითამაშო, რის შემდეგაც, სიამოვნებით დავასრულებდი კარიერას „პარმაში". ეს კლუბი ჩემთვის ძალიან ბევრს ნიშნავს", - განაცხადა 37 წლის იტალიელმა მეკარემ.

შეგახსენებთ, რომ ბუფონმა პირველი ნაბიჯები ფეხბურთში სწორედ „პარმაში" აიდგა და სწორედ იქიდან მიაშურა ტურინის „იუვენტუსს".

შეგახსენებთ, რომ გუშინ სერია A-ს 2014/2015 წლების სეზონის უკანასკნელი ტურის შეხვედრები გაიმართა. მიმდინარე სეზონში იტალიის ყველაზე პრესტიჟული ტიტული „იუვენტუსმა" 87 ქულით მოიპოვა, „პარმამ" კი 19 ქულით სატურნირო ცხრილში ბოლო ადგილი დაიკავა და სერია B-ში დაქვეითდა.