რამდენიმე დღის წინ, ქუთაისის „ტორპედო" შვიდმა ფეხბურთელმა დატოვა. დღეს მათ სიას გუნდის ერთ-ერთი ლიდერი ირაკლი კლიმიაშვილი შეუერთდა. გავრცელებული ინფორმაციით, კლუბის ხელმძღვანელობას შემტევ ნახევარმცველთან კონტრაქტის გახანგრძლივება სურდა, თუმცა ასეთი გადაწყვეტილება თავად ფეხბურთელმა მიიღო.
კლიმიაშვილი „ტორპედოს" ზამთარში შეუერთდა და მოკლე დროში გუნდის წამყვან ფეხბურთელად იქცა. მან ქუთაისელთა მაისურით 14 შეხვედრა ჩაატარა და 2 გოლის გატანა შეძლო. აქტიურ გულშემატკივარს მათგან ერთ-ერთი განსაკუთრებით ემახსოვრება, რომელიც ირაკლიმ მეტოქის კარში პირდაპირ კუთხურიდან ჩაახვია.
კლიმიაშვილს ნათამაშები აქვს თბილისის „ვიტ ჯორჯიაში", „ანჟიში", „ფახთაქორსა" და „სკონტოში". ერთ დროს საქართველოს ახალგაზრდული და შემდგომ ეროვნული ნაკრების წევრი კარიერას, დიდი ალბათობით, კვლავ ლატვიურ კლუბში გააგრძელებს.
