მიმდინარე სატრანსფერო პერიოდში ქუთაისის „ტორპედოში" პირველი ახალწვეულები ჩაირიცხნენ. ქუთაისელთა რიგებში ნახევარმცველი გიორგი კუხიანიძე, მცველი დავით ოდიკაძე და თავდამსხმელი ლაშა შინდაგორიძე ითამაშებენ.

22 წლის კუხიანიძე ქუთაისის სპორტსკოლის აღზრდილია და მისი პროფესიონალური კარიერაც სწორედ „ტორპედოში" დაიწყო, სადაც მან დღემდე 85 ოფიციალური მატჩი ჩაატარა და 11 გოლიც გაიტანა.

34 წლის ოდიკაძე „ტორპედოში"  საჩხერის „ჩიხურადან" გადავიდა. მანამდე იგი თბილისის „დინამოში", ბაქოს „ინტერში" და სხვა საფეხბურთო კლუბებშიც თამაშობდა.

22 წლის შინდაგორიძე აქამდე დანიურ „ორჰუსში", თბილისის „დინამოსა" და ცხინვალის „ცხინვალში" გამოდიოდა. გარდა ამისა, მას საქართველოს 19-წლამდე ნაკრებშიც უასპარეზია. ფეხბურთელებმა „ტორპედოსთან" 1-წლიანი კონტრაქტები გააფორმეს.

ასევე, შესაძლებელია, რომ „ტორპედოში" ითამაშონ:  ნახევარმცველმა დათა სიჭინავამ და ფორვარდებმა გიორგი ჩირგაძემ და გიორგი ქვილითაიამ.