ჭაბუკებში ევროპისა და მსოფლიოს ჩემპიონი ბექა ღვინიაშვილი, წელს ახალგაზრდებში გადაბარგდა, გაზაფხულზე ევროპის ჩემპიონი გახდა,ხოლო 25 ოქტომბერს ლიუბლიანაში მსოფლიოს ჩემპიონობაც მოიპოვა. მოგებაც არის და მოგებაც, ყველა შეხვედრა დროზე ადრე იპონით დაასრულა. ხუთ მეტოქეს ისეთი დღე აყარა, მათი საცოდაობით იწვოდა დარბაზი. ერთმა  ბრძოლის დასრულების შემდეგ ისიც თქვა : ამ კაცის მომგები დიდებშიც არავინ მეგულებაო. საუბარია 90 კგ. კატეგორიაზე,  სადაც ჩვენებურები ვარლამ ლიპარტელიანი და ჯარჯი ზვიადაური ბატონობენ. ხვალ რა იქნება ამაზე ნუ ვიმკითხავებთ, დღეს კი ერთის თქმა შეიძლება ბექას სახით საქართველოს მომავალი ჩემპიონი ეზრდება. გვიმრავლოს.