როგორც მოგეხსენებათ, თბილისის „დინამო" გია გეგუჩაძემ ჩაიბარა და საქართველოს დავით ყიფიანის სახელობის თასის მოპოვების შემდეგ, გუნდი ევროპა ლიგის საკვალიფიკაციო ეტაპზე წარმატებით გამოსვლისთვის ემზადება.
დღეს კლუბის ოფიციალურმა ვებ-გვერდმა გაავრცელა ინფორმაცია, რომ „დინამოს" სამი ფეხბურთელი შეემატა. ამიერიდან, ქართული ფეხბურთის ღირსებას 24 წლის გიორგი ბეგაშვილი, 26 წლის გიორგი გურული და 22 წლის არჩილ ტვილდიანი დაიცავენ.
ბეგაშვილი ამპლუით მეკარე გახლავთ და იგი აქამდე მარტვილის „მერანის" ფერებს იცავდა. მანამდე კი, „ჩიხურაში", „გაგრაში" და „სამტრედიაში" ასპარეზობდა.
გურული მცველია და სხვადასხვა დროს ქუთაისის „ტორპედოსა" და „ზესტაფონში" ირიცხებოდა. მისი უკანასკნელი კლუბი ქობულეთის „შუქურა" გახლავთ. აღსანიშნავია, რომ გიორგი გეგუჩაძის დაქვემდებარებაში ქუთაისურ და ზესტაფონურ კლუბებშიც ასპარეზობდა.
რაც შეეხება ტვილდიანს, იგი მარჯვენა მცველის პოზიციაზე თამაშობს. არჩილმა კარიერა სწორედ თბილისის „დინამოში" დაიწყო, თუმცა უკანასკნელი ორი წლის განმავლობაში ბოლნისის „სიონის", რუსთავის „მეტალურგისა" და ქობულეთის „შუქურას" რიგებში ირიცხებოდა.
აღსანიშნავია, რომ თბილისის „დინამოს" ხელმძღვანელობა ამაზე შეჩერებას ნამდვილად არ აპირებს და უახლოეს მომავალში საკმაოდ ხმაურიან ტრანსფერებს გვპირდება.
