დორტმუნდის „ბორუსიამ" გუნდის მთავარი მწვრთნელის ვაკანტურ პოსტზე თომას ტუხელი წარადგინა.  დიდი ხანია ცნობილია, რომ დორტმუნდიდან წასულ იურგენ კლოპს „მაინცის" 41 წლის ტუხელი შეცვლიდა, დღეს კი კლუბის ხელმძღვანელობამ ახალი მთავარი მწვრთნელი ჟურნალისტებს წარუდგინა.

„თომასი, ჩვენი გუნდის მთავარი მწვრთნელის პოსტზე, ლოგიკური არჩევანი იყო. მას მკაფიო იდეები აქვს, თუ როგორ უნდა ითამაშოს გუნდმა ბურთით და მის გარეშე", - განაცხადა დორტმუნდელთა სპორტულმა დირექტორმა მიხაელ ცორკმა.

„ბორუსიას" ჩაბარებით ძალიან ბედნიერი ვარ. ყოველთვის მინდოდა, დიდი ტრადიციების მქონე გუნდი გამეწვრთნა. ვიცი, რომ შემიძლია ამ კლუბს ვენდო. შეთანხმების დროს ეს მნიშვნელოვანი ფაქტორი იყო. იურგენ კლოპმა აქ 7 დაუჯერებლად წარმატებული სეზონი გაატარა. ახლა, ჩვენ შევეცდებით ,ისტორიაში ახალი ფურცელი ჩავწეროთ და გუნდი ახალ სიმაღლეზე ავიყვანოთ. იურგენმა შესანიშნავი მემკვიდრეობა დატოვა. ვალდებულნი ვართ, ეს გამოვიყენოთ", - ამბობს თომას ტუხელი.

შეგახსენებთ, ტუხელი „მაინცს" სამი სეზონის განმავლობაში წვრთნიდა, მანამდე კი „აუსბურგს" ერთი წლის განმავლობაში ედგა სათავეში.