რეჟისორ ზაზა ურუშაძის „მანდარინებმა" ვარშავის „ა კლასის" კინოფესტივალზე ორ ნომინაციაში გაიმარჯვა - „საუკეთესო რეჟისურა" და „აუდიტორიის ჯილდო".

ფილმის სიუჟეტი აფხაზეთის ომის ფონზე ვითარდება, თუმცა მასში ომის სცენები არ არის ასახული. ფილმი მოგვითხრობს აფხაზეთში მცხოვრებ ესტონელზე, რომელიც ომის დროს საკუთარი სურვილით დარჩა აფხაზეთში. დრამაში აღწერილია ესტონელი გმირის სახლში მოხვედრილი დაჭრილი ქართველი და ჩეჩენი ჯარისკაცების ურთიერთობა.

ფილმში მონაწილეობენ გიორგი ნაკაშიძე, მიხეილ მესხი, ლემბიტ ულფსაკი (ესტონეთში საუკუნის მსახიობად აღიარებული) ელმო იუგანენი, რავიო ტრასსი.

ფილმის კომპოზიტორია ნიაზ დიასამიძე, ასევე გამოყენებულია ირაკლი ჩარკვიანის სიმღერა „მე გადმოვცურავ ზღვას".

ფილმი ეროვნული კინოცენტრის კონკურსის გამარჯვებული პროექტია, სახელმწიფო სუბსიდიამ შეადგინა 472 000 ლარი. ზაზა ურუშაძის ნამუშევარმა ევროპის საბჭოს კინოს განვითარების ფონდის „ევრიმაჟისგან" 110 000 ევროს ფინანსური მხარდაჭერა მოიპოვა.