ევრო 2016-ის შესარჩევი ეტაპის პირველ წრეში პოლონეთთან და გერმანიასთან მიღებული ყვითელი ბარათების გამო, დისკვალიფიკაციის მიზეზით, კახა ცხადაძემ ჯაბა კანკავა ვარშავაში გასამართი მატჩისთვის არ გამოიძახა. შეგახსენებთ, რომ აღნიშნულ მატჩში 0:4 დავმარცხდით, თუმცა უკანასკნელ 5 წუთამდე ქართველები მეტოქეს უშეღავათო ბრძოლას უწევდნენ და გოლის გატანის კარგი შანსიც გვქონდა.

სასიამოვნოა ტექნიკური ინდივიდუალუსტების თამაშის ყურება, მაგრამ ჩვენ, როგორც თემურ ქეცბაიას იტყოდა, არც „მესები" გვყავს და ვინცაა, მათი ფიზმომზადებაც არ არის სასურველ კონდიციებში. კარგია გრაციოზული და ლაღი თამაშის ყურება, მაგრამ შედეგი საბოლოოდ ტაბლოზე აისახება, რაც შემდგომ ნაკრების ბედს გადაწყვეტს. სწორედ ამ შედეგისთვის თამაშდავიწყებული „ჯვაროსანთა" ნაკრები მოხვდა 2018 წლის მუნდიალის საკვალიფიკაციო ეტაპის კენჭისყრის წინ ბოლო, მეექვსე კალათში, მაშინ, როცა ფარერის კუნძულების ეროვნული გუნდი მეოთხე კალათშია განთესილი.

შედეგის მისაღწევად კი, ნაკრებში მაქსიმალურად იმ ფეხბურთელთა დატვირთვაა საჭირო, რომლებიც ნებისმიერ მეტოქესთან შეუპოვრად იბრძვიან ნებისმიერი ხერხით. დღეს ცხადაძის რჩეულთა შორის ასეთი სტილის მოთამაშეთაგან კანკავა, დაუშვილი, ნავალოვსკი და გოგუა გამოირჩევიან. ამ უკანასკნელმა პოლონეთთან ტრავმის გამო ვერ ითამაშა, დაუშვილი მეორე ტაიმში გამოვიდა მოედანზე და აშკარად უკეთესობისკენ დაეტყო ხელი ჩვენი ნაკრების თამაშს. ნავალოვსკი მოედანზე ერთ-ერთი საუკეთესო იყო, კანკავამ კი ოფიციალური მიზეზით - დისკვალიფიკაციის გამო გამოტოვა შეხვედრა, თუმცა როგორც ახლა ირკვევა, სრულიად ტყუილად.

პოლონეთის ფეხბურთის ფედერაციის პრეზიდენტმა ზბიგნევ ბონეკმა სენსაციური განცხადება გააკეთა:

„უეფა" შეხვედრების წინ ფედერაციებში აგზავნის მოთამაშეთა სიებს, რომლებშიც ასახულია დისკვალიფიცირებულთა ან მორიგი მატჩის გამოტოვების საფრთხის ქვეშ მყოფ ფეხბურთელთა ვინაობები. თუ ფეხბურთელის გვარის გასწვრივ ვარსკვლავია ასახული, ეს არა დისკვალიფიკაციას, არამედ მის რისკს ნიშნავს. როგორც ჩანს, ქართველებმა ეს ინფორმაცია შეცდომით გაიგეს".

„უეფა"-ს რეგულაციებში კი ნათქვამია: „შესარჩევ ტურნირში ფეხბურთელი დისკვალიფიცირებულია, თუ სამ სხვადასხვა შეხვედრაში მიიღებს გაფრთხილებას. ისევე, როგორც ტურნირზე მეხუთე გაფრთხილების მიღებისას".

როგორც ირკვევა, კანკავას სრულიად ტყუილად გამოუტოვებია პოლონეთთან დაპირისპირება. დაზუსტებით ვერავინ იტყვის, რა მოხდებოდა აღნიშნულ მატჩში მისი ყოფნის შემთხვევაში, თუმცა ფაქტია, რომ ჯაბა „ჯვაროსანთა" ლიდერია, რომელსაც საკმაოდ მაღალი დონის მეტოქეებთანაც კი შეუძლია ბრწყინვალედ გამოსვლა.

საინტერესოა, რამდენად დაისჯება ვინმე ამ ქმედების გამო, მტერს აუცილებლად მეზარბაზნეების არყოფნა უნდა შეატყობინო, რომ ღალატში ჩაითვალოს?! ასეთი არაპროფესიონალიზმის გამო ჯერ კიდევ ახლო წარსულშიც საკმაოდ ბევრჯერ წავიტეხეთ კისერი. იმედია, კომპეტენტური ორგანოები ამჯერად მაინც არ დახუჭავენ თვალს.