11 საათის გასვლის შემდეგ სუპერთასის მატჩზე დასასწრები 24 000 ბილეთიდან მხოლოდ 1 500-ია გაყიდული.

ონლაინ-გაყიდვა, რომელიც დილის ცხრა საათიდან დაიწყო, კვლავ ტექნიკური შეფერხებებით მიმდინარეობს. ამ წუთისთვის არსებული მონაცემით, ბილეთები.ჯი-ს საიტზე საკუთარ რიგს 143 000-ი ადამიანი ელოდება. იზრდება უკმაყოფილო მომხმარებლების რიცხვიც.

მოქალაქეები, რომლებმაც ბილეთების ყიდვა ვერ მოახერხეს, ამ წუთებში ფეხბურთის ფედერაციასთან არიან შეკრებილები. აქციაზე მყოფთა უმრავლესობას ძირითადად ერთი და იგივე პრობლემა შეექმნა: რიგის მოსვლის დროს საიტმა მათ ავტორიზაციის გავლის საშუალება აღარ მისცა.

შეფერხებებთან დაკავშირებით საკუთარი ეჭვი აქვს ფედერაციას, რომელიც სამართალდამცავ უწყებებს მიმართავს.

(მოამზადა თეონა რამაზაშვილმა)